რა ხდება: ჯანდაცვის სამინისტროს ინფორმაციით, კლინიკის 350-მდე სამედიცინო პერსონალმა და ადმინისტრაციის თანამშრომელმა, სამინისტროს მიერ შეთავაზებული საკომპენსაციო პაკეტი უკვე აირჩია და შესაბამისი შეთანხმებით დაადასტურა.

დეტალები: მათივე ცნობით, სამედიცინო პერსონალის ნაწილი მუშაობას იმ კერძო სამედიცინო დაწესებულებაში აგრძელებს, რომელიც ჯანდაცვის სამინისტროს ჩართულობით, რესპუბლიკური საავადმყოფოს სამედიცინო პერსონალს ალტერნატიულ დასაქმებას სთავაზობს.

  • უწყებამ ამ მიმართულებით 10-ზე მეტ სამედიცინო დაწესებულებასთან გამართა მოლაპარაკებები.
  • "მნიშვნელოვანია, რომ კლინიკაში დასაქმებული სამედიცინო პერსონალის უფლებები იქნება სრულად დაცული. რესპუბლიკური საავადმყოფოს თითოეული თანამშრომელი,
    უზრუნველყოფილი იქნება დასაქმების ალტერნატიული შეთავაზებით, თუ ღირსეული კომპენსაციით", — წერია ჯანდაცვის სამინისტროს მიერ გავრცელებულ პრესრელიზში.

ბოლო ხაზი: რესპუბლიკური საავადმყოფოს თანამშრომლების ნაწილი მთავრობის მიერ შემოთავაზებული კომპენსაციების პაკეტს არ თანხმდება და მოითხოვს, კლინიკის დემონტაჟის გადაწყვეტილება გაუქმდეს.

  • მათი განმარტებით, კლინიკა "სპეციალურად გადაიყვანეს ისეთ რეჟიმში, რომ ყოფილიყო წამგებიანი საავადმყოფო".
  • მათი თქმით, გაუქმდა ბევრი სერვისი, რომელსაც სამედიცინო დაწესებულებისთვის შემოსავალი მოჰქონდა.