სომხეთის ეკონომიკის მინისტრმა, ვაჰან კერობიანმა მის უწყებაში კორუფციაზე გამოძიების დაწყების შემდეგ, თანამდებობა დატოვა.

კერობიანმა ოთხშაბათს "ფეისბუქზე" გამოქვეყნებულ პოსტში დაწერა, რომ მინისტრის პოსტს დატოვებს, თუმცა დამატებითი განმარტებები არ გაუკეთებია.

"სამ წელზე მეტი ხნის განმავლობაში, მე ვმუშაობდი ურყევი ერთგულებით და სიყვარულით, სომხეთის თითოეული მოქალაქის მიმართ“, — თქვა მან და განაგრძო მისი, როგორც მინისტრის მიღწევების ჩამოთვლა.

კერობიანი მინისტრად დაინიშნა 2020 წლის ნოემბერში, მთიანი ყარაბაღის მეორე ომში, სომხეთის დამარცხებიდან მალევე.

"ამ პერიოდის განმავლობაში, მრავალი უთანხმოების გამო, ბევრჯერ მინდოდა ამ სამსახურის დატოვება, მაგრამ თავი დავირწმუნე, რომ ჩემი ქვეყნისთვის მაქსიმალურად მემსახურა“, — თქვა მან.

კერობიანმა, ასევე, მადლობა გადაუხადა პრემიერ მინისტრს ნიკოლ ფაშინიანს, რომ მას "ქვეყნის სამსახურში ყოფნის შესაძლებლობა“ მისცა.

მიუხედავად იმისა, რომ კერობიანმა არ თქვა, რატომ გადადგა თანამდებობიდან, გადაწყვეტილება მიიღო მას შემდეგ, რაც ეკონომიკის მინისტრის მოადგილეს, ანი ისპირიანს სამინისტროში კორუფციის გამოძიების ფარგლებში, შინაპატიმრობა შეუფარდეს.

მას შემდეგ ხელისუფლებამ კიდევ ექვსი პირი დააკავა.

ხუთშაბათს კერობიანი სომხეთის საგამოძიებო კომიტეტმა და ეროვნული უსაფრთხოების სამსახურებმა დაიბარეს. ხუთშაბათს საგამოძიებო კომიტეტის შენობის წინ დაკითხულმა კერობიანმა რადიო თავისუფლებას განუცხადა, რომ მისთვის ჯერ არც ბრალი წაუყენებიათ და არც დაუკითხავთ.

ისპირიანის დაკავების დროს, საგამოძიებო კომიტეტმა განაცხადა, რომ გაჩხრიკეს 15 ადგილი, როგორც სამინისტროში, ასევე — პირად სახლებში, ორ სისხლის სამართლის საქმესთან დაკავშირებით.

კომიტეტმა განაცხადა, რომ თანამდებობის პირებმა ბოროტად გამოიყენეს სამსახურებრივი უფლებამოსილება.

კერობიანმა გააკრიტიკა ეს დაპატიმრებები და გასულ კვირას მთავრობის სხდომაზე განაცხადა, რომ ისჯებიან ადამიანები, რომლებიც არ იპარავდნენ, ეს დაპატიმრებები კი სამინისტროს მუშაობის პარალიზებას იწვევს.

"ჩვენი სოფლის მეურნეობის განყოფილებებში გვეკითხებიან: როგორ გავაგრძელოთ მუშაობა და როგორ ვიყოთ დარწმუნებული, რომ ჩვენი პატიოსანი შრომა საბოლოოდ არ დაისჯება?“ - თქვა კერობიანმა.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.