მოკლედ: ერთიანი ნაციონალური მოძრაობის ინფორმაციით, ხელმოწერების შეგროვება მიხეილ სააკაშვილის გათავისუფლების მოთხოვნით, დღეს, 17 თებერვალს, რუსთავში გაგრძელდება.

დეტალები: პარტიის წევრის, სოფო ჯაფარიძის თქმით, რუსთავში ჩასულს ხელმოწერის მსურველთა "წარმოუდგენლად დიდი რიგი" დახვდა.

  • ჯაფარიძემ აღნიშნა, რომ რუსი ოპოზიციონერი პოლიტიკოსის ალექსეი ნავალნის გარდაცვალებამ დაგვანახა, რამდენად სასწრაფოა მიხეილ სააკაშვილის გათავისუფლება. "ჩვენ ძალიან ბევრჯერ მოგისმენია ვლადიმერ პუტინისგან, რამდენჯერ გაავლო მან პარალელი ნავალნისა და მიხეილ სააკაშვილს შორის, რამდენჯერ დაემუქრა როგორც ნავალნის, ასევე მიხეილ სააკაშვილს სიცოცხლის განადგურებით".
  • სოფო ჯაფარიძემ კიდევ ერთხელ მოუწოდა სალომე ზურაბიშვილს გაათავისუფლოს მიხეილ სააკაშვილი.

ასევე, ალექსეი ნავალნის გარდაცვალებას და მიხეილ სააკაშვილის გათავისუფლების "აუცილებლობას" ფეისბუქზე პარტია ერთიანი ნაციონალური მოძრაობის თავმჯდომარე ლევან ხაბეიშვილიც გამოეხმაურა. მისი თქმით, ბიძინა ივანიშვილი, რომელიც საქართველოში "პუტინის მანიაკური იდეოლოგიის გამგრძელებელია", ქვეყნისთვის უდიდესი საფრთხეა, რადგან ივანიშვილი ერთ დღეში იმეორებს პუტინის მოქმედებებს "პრეზიდენტ სააკაშვილის წინააღმდეგ, დაწყებული მოწამვლით, გაგრძელებული მის წინააღმდეგ ფიზიკური თუ ფსიქოლოგიური ანგარიშსწორებით".

  • ხაბეიშვილი აღნიშნას, რომ ნავალნის გარდაცვალება კიდევ უფრო უნდა აჩქარებდეს სალომე ზურაბიშვილის მხრიდან გადაწყვეტილების მიღებას — არ მიიღოს მონაწილეობა ივანიშვილის "ბინძურ მოქმედებებში", რომელიც "თანხვედრაშია მკვლელი პუტინის სურვილებთან და მოქმედებებთან". მისი თქმით, ევროკავშირში არავინ მიგვიღებს ივანიშვილთან ერთად და მისი "ხელმძღვანელობით".
  • "უნდა ესმოდეს პრეზიდენტს, რომ ახლა მნიშვნელოვანია, დროული მოქმედება მიხეილ სააკაშვილის საქმესთან დაკავშირებით", — წერს ხაბეიშვილი.

კონტექსტი: გუშინ, 16 იანვარს, სოფო ჯაფარიძემ განაცხადა, რომ ერთიანი ნაციონალური მოძრაობა და მიხეილ სააკაშვილის "ასობით ათასი მხარდამჭერი" , სააკაშვილის გათავისუფლების მიზნით, ხელმოწერების შეგროვებას იწყებენ ქვეყნის მასშტაბით.

  • ჯაფარიძის თქმით, შეგროვებულ ხელმოწერებს გადასცემენ პრეზიდენტ სალომე ზურაბიშვილს 1-ელ მარტს, 15:00 საათზე, რაც "ძალიან დიდი ნაბიჯი იქნება მიხეილ სააკაშვილის თავისუფლებისთვის".
  • ჯაფარიძემ აღნიშნა, რომ ხელმოწერების შეგროვებაში აქტიურად იქნებიან ჩართულები ენმ-ს რაიონული ორგანიზაციები, რომლებიც კოორდინაციაში დაეხმარებიან.