რა ხდება: დღეს, 11 თებერვალს, რუსთავის საქალაქო სასამართლომ 4 პირის მკვლელობისა და 1 პირის დაჭრის საქმეზე ბრალდებულს პატიმრობა შეუფარდა.

  • მკვლელობასა და დაჭრაში ბრალდებული გიორგი ორველაშვილია.
  • მოსამართლე ეკატერინე პართენიშვილის გადაწყვეტილებით, პატიმრობა შეეფარდა მის ძმას, გოგიტა ორველაშვილსაც — მას ცეცხლსასროლი იარაღის დაუდევრად შენახვის ფაქტზე აქვს ბრალი წარდგენილი და მის წინააღმდეგ საქმე სისხლის სამართლის კოდექსის 238-ე მუხლით მიმდინარეობს.
  • ამ საქზე მომდევნო სასამართლო სხდომა 5 აპრილისთვის ჩაინიშნა.

რა იყო მკვლელობის მოტივი — პროკურატურის ვერსია: საქმის პროკურორის, ქეთევან სონიძის თქმით, შურისძიება.

სასამართლოსთან, პროკურორმა მედიასთან დეტალებზე ისაუბრა და თქვა, რომ:

  • ბრალდებული გიორგი ორველაშვილმა შურისძიების მოტივით განიზრახა საკუთარი ბიძის, ნოდარ ორველაშვილის და ბიძაშვილის — ნიკოლოზ ორველაშვილის მოკვლა. ნიკოლოზ ორველაშვილი სიკვდილს გადაურჩა.
  • პროკურორი: "ჩატარებული გამოძიებით დადგენილია, რომ მათ შორის კონფლიქტი უკავშირდებოდა ბრალდებულის ცუდ სიმთვრალეს. ის მთვრალ მდგომარეობაში ხდებოდა არაადეკვატური და აყენებდა შეურაცხყოფას როგორც გარშემომყოფებს, ასევე, ოჯახის წევრებს. იყო შემთხვევები, როდესაც დახარჯა ე.წ. სავაჭრო თანხა", — თქვა ქეთევან სონიძემ და აღნიშნა, რომ ახალ წლამდე პერიოდში ბრალდებულს კონფლიქტი მოუხდა ბიძასთან, ნოდარ ორველაშვილთან, რომელთანაც გამყიდველის პოზიციაზე მუშაობდა ბაზარში.
  • მისივე თქმით, კონფლიქტის შემდეგ, გიორგი ორველაშვილი ბიძამ სამსახურიდან დაითხოვა. "წავიდა სოფელში და შემდეგ მოხდა ის, რაც მოხდა", — ამბობს პროკურორი.

ბოლო ხაზი: რუსთავის ბაზარში მკვლელობა 9 თებერვალს მოხდა.

  • სამართალდამცავებმა ბრალდებული ადგილზე დააკავეს.
  • გარდაცვლილთა შორის ერთ-ერთი ბრალდებულის ბიძაა, რომელიც ე.წ სტამბოლის ბაზარში იყო დასაქმებული.
  • ბრალდებულის დაჭრილი ბიძაშვილი შემთხვევიდან მალევე გადაიყვანეს საავადმყოფოში. მისი მდგომარეობა სტაბილურია.