კობახიძე სააკაშვილისა და ექსპრეზიდენტის საქმის მოსამართლის წინააღმდეგ

რა ხდება: საქართველოს პრემიერ-მინისტრობის კანდიდატი, ირაკლი კობახიძე, ამბობს, რომ "არასწორია" მიხეილ სააკაშვილის საქმის მოსამართლის გადაწყვეტილება, სასამართლო პროცესზე პირდაპირი ჩართვებისას ეთმობოდეს პოლიტიკური პლატფორმა ყოფილ პრეზიდენტს.

ამის შესახებ მან პარტია საქართველოსთვის წევრის, ანა ბუჩუკურის კრიტიკის საპასუხოდ განაცხადა.
ბუჩუკურის შეფასებით, სააკაშვილი "პრივილეგირებულ მდგომარეობაშია", რადგან სააკაშვილს პარტიული საქმიანობა ეკრძალება, თუმცა, "სასამართლო სხდომაზე პარტიულ თათბირებს ატარებს" და ამით მონაწილეობს პარტიულ საქმიანობაში.

დეტალები: კობახიძემ, გიორგი გახარიას პარტიის დეპუტატის, ანა ბუჩუკურის შეკითხვის პასუხად, ასევე, თქვა, რომ ლეგიტიმურია ნებისმიერი შენიშვნა იმასთან დაკავშირებით, რომ არ შეიძლება სასამართლო იყოს გამოყენებული, როგორც პოლიტიკური სიტყვის გამოხატვის პლატფორმა.

კობახიძემ "პრივილეგირებული" უწოდა სააკაშვილის საქმის მოსამართლეს: "რბილად რომ ვთქვათ, არასწორი მოვლენაა, თუმცა, შეგიძლიათ, მოიკითხოთ, ვისგან და რატომ არის ეს კონკრეტული მოსამართლე პრივილეგირებული, რომელიც პოლიტიკურ პლატფორმას აძლევს მიხეილ სააკაშვილს სასამართლო სხდომათა დარბაზში", — თქვა მან.
კობახიძემ, ასევე, აღნიშნა, რომ საკითხზე მეტს არ ისაუბრებს, რადგან ამ ეტაპზე სარგებლობს იმით, რომ "ჯერ კიდევ დეპუტატია", მას შემდეგ კი, რაც აღმასრულებელ ხელისუფლებაში გადავა, გაუჭირდება ასეთი კომენტარების გაკეთება.
"თუმცა კიდევ ერთხელ, მოიკითხეთ, რასთან შეიძლება გვქონდეს საქმე. საბოლოო ჯამში, კვალი შეიძლება მივიდეს იქ, სადაც თქვენი კვალიც მიდის", — უთხრა კობახიძემ ბუჩუკურს.

სტრიქონებს შორის: ირაკლი კობახიძემ გუშინ, 7 თებერვალსაც ისაუბრა საპარლამენტო ტრიბუნიდან პატიმრობაში მყოფი საქართველოს მესამე პრეზიდენტის, მიხელ სააკაშვილის თაობაზე. "სააკაშვილი, რომელიც, ოპოზიციის თანახმად, ფატალური რისკების წინაშე იყო, დღეს პოლიტიკაშია ჩართული", — თქვა მან — "სხვა პატიმრებს უწევთ საკანში პატიმრობის ვადის მოხდა, მიხეილ სააკაშვილი არის 2-ოთახიან პალატაში, ყოველგვარი დასაბუთების გარეშე. მორალური შეხედულებიდან გამომდინარე, მე ამით დავითრგუნებოდი. არ ვიცი, რამდენად ითრგუნება ამით მიხეილ სააკაშვილი."

ბოლო ხაზი: ირაკლი კობახიძეს დეპუტატები დღეს, 8 თებერვალს, პარლამენტში უსმენენ, რადგან პარლამენტმა მას, როგორც პრემიერ-მინისტრობის კანდიდატს, და ასევე, მინისტრთა კაბინეტის განახლებულ შემადგენლობას, ნდობა უნდა გამოუცხადოს.