მოკლედ: თბილისის მერიის ინფორმაციით, აკაკი წერეთლის გამზირზე საავტომობილო მოძრაობა ორმხრივად აღდგა, მიმდინარე სამუშაოები კი მარტში დასრულდება.

დეტალები: რეაბილიტაციის შედეგების სანახავად ადგილზე მივიდნენ თბილისის მერი, კახა კალაძე და მისი მოადგილე, ირაკლი ბენდელიანი.

  • კალაძის თქმით, წერეთელზე ჯერ კიდევ მიმდინარეობს ტროტუარების მოწყობა, გამწვანება, შუქნიშნების დამონტაჟება და სხვა.
  • "არ მინდა შეცდომაში შევიდეს საზოგადოება და იფიქროს, რომ პროექტი მთლიანად დასრულდა", — აღნიშნავს კალაძე.

კონტექსტი: წერეთლის გამზირის რეაბილიტაცია 2023 წლის 19 აპრილს დაიწყო და 2024 წლის იანვრის ბოლოსთვის უნდა დასრულებულიყო.

  • მთლიანობაში, პროექტისთვის გამოყოფილი იყო 32 600 000 ლარი. აქედან წერეთლის გამზირის რეაბილიტაციისთვის 28 მილიონ 400 ათასი, დანარჩენი — დიდუბის რაიონში, შოთა შალიკაშვილის სახელობის ხიდის რეაბილიტაციისთვის დაიხარჯა.
  • 16 იანვარს ცნობილი გახდა, რომ თბილისის მერიამ კონტრაქტი შეუჩერა ორ კომპანიას, რომელთაც პროექტის რეაბილიტაცია იანვრის ბოლომდე უნდა დაესრულებინათ.
  • მეორე დღეს, 17 იანვარს მერიამ, სანაცვლოდ, დაიქირავა 4 კომპანია. ესენია: ენკო, პარმა, ჯეო გრუპი და ბლექ სი გრუპი.
  • იმავე დღეს, ენმ-ის პოლიტსაბჭოს წევრმა მერიასთან ტალახი მიიტანა და თქვა, რომ ეს კალაძის კორუფციის სიმბოლოა.