მზადება დიდი შემოდგომისთვის და დიდი შემოდგომა — ასე ჰქვია კამპანიებს, რომელთა ფარგლებშიც ინოვაციური სასოფლო-სამეურნეო პროდუქციისა და აგროტექნიკის იმპორტიორმა კომპანია აგროსფერომ 18 თანამედროვე ფერმერი გაგვაცნო. კომპანია გადამღებ ჯგუფთან ერთად საქართველოს სხვადასხვა რეგიონში 10-ზე მეტ სოფელს ესტუმრა და ვიდეო სერიაში თავი მოუყარა იმ ადამიანების ისტორიებს, რომლებიც დღეს საქართველოში ხარისხიან სასოფლო-სამეურნეო კულტურებს აწარმოებენ.

ვიდეოების საშუალებით ვეწვიეთ ულამაზეს ვენახებს, მოვინახულეთ ატმის, კაკლის, თხილის, ნუშის, კომბოსტოს მოვლილი ბაღები და ხორბლისა და სიმინდის ყანები. რაც მთავარია, გავიცანით ადამიანები, რომლებსაც არც დაუღალავი შრომა აშინებთ და არც სიახლეები, რათა წარმატებული მეურნეობები შექმნან და ქვეყანა ჯანსაღი პროდუქტებით უზრუნველყონ.

"დიდი იდეის გარეშე არც ერთი საქმის წამოწყება არ ვარგა. ვგულისხმობ, რომ ხარისხით გავითქვათ სახელი", — ამბობს კამპანიის ერთ-ერთი გმირი და მართლაც, ნებისმიერი ვიდეოს ნახვისას დარწმუნდებით, რომ თითოეული ფერმერის პრიორიტეტი სწორედ ჯანსაღი და ხარისხიანი პროდუქტის შექმნაა.

ვიდეო ისტორიებში ფერმერები მოგვითხრობენ იმ თანამედროვე ტექნოლოგიებსა და მეთოდებზეც, რომლებიც მათ ამგვარი სასოფლო-სამეურნეო კულტურების წარმოებაში ეხმარება. ასევე, გვაცნობენ მათ რჩეულ სათესლე მასალებს, სასუქებსა და მცენარეთა დაცვის საშუალებებს და გვიხსნიან მიზეზებს, რატომ იქცა ისინი მათი ყოველდღიური საქმიანობის განუყოფელ ნაწილად.

აგროსფერო თანამედროვე ფერმერთა ერთგული მხარდამჭერია, ამიტომ ვცდილობთ, ისინი არა მხოლოდ ხარისხიანი სასოფლო-სამეურნეო პროდუქციითა და აგროტექნიკით

უზრუნველვყოთ, არამედ მათი ისტორიები ფართო საზოგადოებამდეც მივიტანოთ.

"მზადება დიდი შემოდგომისთვის და დიდი შემოდგომა ამ ეტაპზე დასრულდა, თუმცა ჩვენი გუნდი უახლოეს მომავალში სხვა საინტერესო კამპანიებს გეგმავს, რომელთა მეშვეობითაც კიდევ უფრო მეტ თანამედროვე ფერმერსა და წარმატებულ მეურნეობებს გაგაცნობთ", — გვითხრა აგროსფეროს მარკეტინგის განყოფილების ხელმძღვანელმა, აკაკი ტოროტაძემ.