საქართველოს ენერგეტიკისა და წყალმომარაგების კომისიამ (სემეკი) გაზის ტრანსპორტირების ტარიფი გაზარდა. 20 ივლისიდან საქართველოს გაზის ტრანსპორტირების კომპანია ერთი კუბური მეტრი გაზის ტრანსპორტირებისთვის 1,884 თეთრს მიიღებს. ეს რიგ შემთხვევებში გაორმაგებული ტარიფია. გაზრდილი ტარიფის შესახებ ინფორმაცია On.ge-ს სემეკის პრესსამსახურიდან მიაწოდეს.

ახალი ტარიფები ძალაში 2018 წლის 31 დეკემბრამდე იქნება.

2000 წლიდან დღემდე გაზის ტრანსპორტირების ტარიფი ასეთი იყო:

  • თბოელექტროსადგურებისთვის - 0,9 თეთრი;
  • ყაზბეგის გაზისთვის - 0,9 თეთრი;
  • დუშეთის გაზისთვის - 1,167 თეთრი;
  • დანარჩენი მომხმარებლებისთვის 1,383 თეთრი.

გაზის ტრანსპორტირების ტარიფი სამომხმარებლო ფასის ერთ-ერთი კომპონენტია. ხვალ, 18 ივლისს სემეკი შპს ყაზტრანსგაზ თბილისისთვის, შპს სოკარ ჯორჯია გაზისა და სს საქორგგაზისთვის ბუნებრივი გაზის მიწოდების, განაწილების, გატარებისა და მოხმარების ტარიფებს დაადგენს.