რა ხდება: "ივანიშვილის კორუფციულ-ოლიგარქიულ იერარქიაში წინაურდება კობახიძე და ახლა ის გაცილებით მეტს მოიპარავს მაშინ, როდესაც ღარიბაშვილი შეირგებს უკვე მოპარულს", — ასე აფასებს ერთიანი ნაციონალური მოძრაობის პოლიტსაბჭოს წევრი, ნიკა ობოლაძე მოსალოდნელ სამთავრობო ცვლილებას.

დეტალები: ნიკა ობოლაძე აცხადებს, რომ პრემიერ-მინისტრის შეცვლით მხოლოდ ის შეიცვლება, რომ პარტია ქართული ოცნების საპატიო თავმჯდომარის, ბიძინა ივანიშვილის კორუფციულ იერარქიაში როლები გადანაწილდება.

  • "ღარიბაშვილმა უზომოდ ბევრი მოიპარა; იმდენი, რომ საკუთარ სტუდენტ შვილს 100 000-ლარიანი ჩარტერით უშვებდა "სასწავლებლად" [ამერიკის შეერთებულ შტატებში] მაშინ, როდესაც სხვისი სტუდენტი შვილები გადაჭედილ ავტობუსში ვერ ადიან. ეს ავტობუსები საცობში დგას და თითოეულიდან 100 000 ევრო კალაძის კლანს აქვს ჯიბეში ჩადებული. ეს სტუდენტები ვერ მიდიან სამსახურებში, სადაც 600-800 ლარზე ღამეს ათევენ, რომ საკუთარი სწავლის საფასური გადაიხადოს", — ამბობს ის.
  • ენმ-ის პარტიის პოლიტსაბჭოს წევრი ასევე, ამბობს, რომ ხალხისთვის რეალური ცვლილება ახალი მთავრობა იქნება, რომელიც მოემსახურება ხალხს და რომლის მიზანი ხალხის ხარჯზე გამდიდრება კი არა, საქართველოში ინვესტიციების შემოტანა და მაღალანაზღაურებადი, ღირსებული სამუშაო ადგილების შექმნა იქნება: "ეს არის ხალის შეურაცხყოფა და ხალხის ძარცვა უნდა დასრულდეს 2024 წლის არჩევნებზე", — განაცხადა ნიკა ობოლაძემ.

კონტექსტი: სახელისუფლებო არხის, იმედის მიერ დღეს გავრცელებული ინფორმაციის თანახმად, პრემიერ-მინისტრის პოსტზე ირაკლი ღარიბაშვილს ირაკლი კობახიძე შეცვლის.

ბოლო ხაზი: ირაკლი ღარიბაშვილს იმედის მიერ გავრცელებული ცნობა ამ დრომდე არ დაუდასტურებია. მან მთავრობის ადმინისტრაციაში დააანონსა ბრიფინგი დღეს, 17:00 საათისთვის.