როგორც ცოტა ხნის წინ ცნობილი გახდა, დისნეის ერთ-ერთი პოპულარული სერიალი ჯადოქრები უეივერლიდან წლების შემდეგ ეკრანზე ბრუნდება. შოუს გულშემატკივრები წლებია, მსჯელობენ იმაზე, გადაიღებს თუ არა დისნეი სერიალის გაგრძელებას და ეს დროც დადგა.

ფოტო: Disney

სავარაუდოა, რომ გადაღებები უკვე დაიწყო, რადგან შოუს მსახიობებმა წლების მერე პირველი ერთობლივი ფოტო გამოაქვეყნეს. ფოტოზე სელენა გომესი, დევიდ ჰენრი, დევიდ დელუისი და მარია კანალს-ბარერა არიან. სელენა და დევიდ ჰენრი სერიალში და-ძმა ალექს და ჯასტინ რუსოების როლებს ირგებენ, მარია და დევიდ დელუისი კი მათი მშობლების.

სელენა და დევიდ ჰენრი პროექტის აღმასრულებელი პროდიუსერებიც იქნებიან. დევიდ დელუისმა Wizards of Waverly Place-ის პოდკასტში სერიალის ახალი სეზონის გამოსვლის თარიღი დაანონსა და თქვა, რომ შოუ 6 ნოემბერს დაბრუნდება.

აღსანიშნავია, რომ გომესი საზოგადოებამ სწორედ დისნეის ამ შოუთი გაიცნო. ჯერჯერობით, დაზუსტებით ვიცით, რომ ორიგინალი მსახიობებიდან ახალ სეზონში სელენა და დევიდ ჰენრი იქნებიან.

როგორც ცნობილია, Wizards of Waverly Place-ის გაგრძელებაში სიუჟეტი ჯასტინ რუსოს გარშემო განვითარდება, რომელიც უკვე ზრდასრულია და ცოლ-შვილი ჰყავს. მან ჯადოქრობის უნარზე უარი თქვა და ჩვეულებრივი ადამიანივით ცხოვრება არჩია, თუმცა ის დილემის წინაშე აღმოჩნდება — ჯასტინს ახალგაზრდა ჯადოქარი მასწავლებლობას სთხოვს. ვნახოთ, როგორ განვითარდება მოვლენები.

დევიდ ჰენრიმ სელენასთან და მსახიობებთან ერთად, რომლებიც მისი ცოლისა და შვილების როლებს თამაშობენ, ფოტო გამოაქვეყნა.

ორიგინალი სერიალი ეთერში 2007-2012 წლებში გადიოდა და რუსოების ოჯახზე გვიყვებოდა. სელენა და მისი ძმები, ალექსი და მაქსი ჯადოქრები იყვნენ, დედა კი — ჩვეულებრივი ადამიანი. მამა მათ ჯადოქრობის ძალის კონტროლსა და სწორად გამოყენებას ასწავლიდა.

2009 წელს სერიალზე პირველი ფილმი გადაიღეს, 2013-ში კი საყვარელი პერსონაჟები მაყურებლებს ახალი პროექტით Alex Vs. Alex დაუბრუნდნენ.