მოკლედ: სომხეთსა და საქართველოს შორის სტრატეგიული ურთიერთობის შესახებ მემორანდუმი გაფორმდა.

  • ამის შესახებ საქართველოში სტუმრად მყოფმა ნიკოლ ფაშინიანმა და ირაკლი ღარიბაშვილმა პრესკონფერენციაზე ისაუბრეს.

დეტალები: მემორანდუმს ხელი მოეწერა საქართველოსა და სომხეთს შორის ეკონომიკური თანამშრომლობის მთავრობათაშორისი კომისიის მე-13 სხდომაზე.

  • მთავრობის ადმინისტრაციის ინფორმაციით, სხდომაზე საქართველოსა და სომხეთს შორის ეკონომიკური თანამშრომლობის საკითხები განიხილეს;
  • ისაუბრეს ქვეყნებს შორის თანამშრომლობის პოტენციალზე როგორც ეკონომიკური ურთიერთობების და ვაჭრობის, ისე ტრანსპორტის, ენერგეტიკის, ტურიზმის, კულტურისა და განათლების მიმართულებით.
  • ღარიბაშვილის თქმით, საქართველოსთვის სომხეთი ერთ-ერთ მნიშვნელოვანო სავაჭრო პარტნიორია უკანასკნელი წლების განმავლობაში, საქართველოს ძირითადი სავაჭრო პარტნიორების ათეულშია.
  • 2023 წლის მონაცემების თანახმად, ძირითადი სავაჭრო პარტნიორი ქვეყნების ათეულში სომხეთი სავაჭრო ბრუნვის მიხედვით, წინა წლის ანალოგიურად, მე-6 ადგილზეა.

ირაკლი ღარიბაშვილმა აღნიშნა, რომ საქართველო და სომხეთი "ისედაც იყვნენ სტრატეგიული მეგობრები და პარტნიორები", დღეს კი უკვე ოფიციალურად მოეწერა ხელი თანამშრომლობის შესახებ შეთანხმებას.

  • გაფორმდა სოფლის მეურნეობის სფეროში თანამშრომლობის შესახებ ურთიერთგაგების მემორანდუმიც.
  • მხარეებმა ხელი მოაწერეს ჯანდაცვის სფეროში ურთიერთგაგების მემორანდუმს;
  • ასევე, შეთანხმებას ორი ქვეყნის დიპლომატიური წარმომადგენლობებისა და საკონსულო დაწესებულებების საქმიანობის პირობების გაუმჯობესების შესახებ.
  • დოკუმენტებს ხელი სომხეთისა და საქართველოს მინისტრთა კაბინეტის წევრებმა მოაწერეს.