"მივმართავ ფაშისტ, ჰომოფობ მოძალადეებს - თქვენ არ გექნებათ საშუალება, რომ ქართული საზოგადოება, რომელიც დაფუძნებულია თავისუფალ მოქალაქეებზე და აქვს მყარი ევროპული ფასეულობები, აქციოთ მოძალადე საზოგადოებად", - ასე გამოეხმაურა თათია დოლიძის მიმართ ფეისბუკზე გამოთქმულ სექსუალური შინაარსის მუქარას თბილისის მერობის კანდიდატი, ელენე ხოშტარია. პარტია ევროპული საქართველოს დეპუტატმა, დღეს გამართულ ბრიფინგზე განაცხადა, რომ დაიწყებს მოლაპარაკებებს ყველა საზოგადოებრივ-პოლიტიკურ ჯგუფთან, რომ ჩამოყალიბდეს ერთიანი რეაგირების გეგმა მოძალადეებისა და ძალადობის წინააღმდეგ:

"ვიცით, რომ ეს ჯგუფები თავის დროზე წახალისებული იყო ხელისუფლების მხრიდან, ისინი იყენებდნენ ამ ჯგუფებს პოლიტიკური ძალადობისთვის და დღეს ჩვენ ვხედავთ აბსოლუტურად უმოქმედო, უუნარო ხელისუფლებას, რომელიც არ იცავს თავის მოქალაქეებს. მსგავს შემთხვევებში, ჩვენი, მთლიანად საზოგადოების ვალია, რომ ამ მოქმედებამ მიიღოს სათანადო პასუხი საზოგადოების მხრიდან."

თათია დოლიძის მიმართ ქსენოფობიური ქართველთა მარშის ორგანიზატორები და მონაწილეები, გუშინ, 16 ივლისს, ფეისბუკზე სექსუალური ძალადობის შინაარსის კომენტარებს წერდნენ, რომლებიც მუქარად აღიქმებოდა. დღეს, აღნიშნული პოსტი აღარ იძებნება. თავად პოსტების ავტორთა ნაწილი ამბობს, რომ მათ ეს არ დაუწერიათ. "ქართველთა მარშის" მონაწილეები გამოირჩევიან ქსენოფობიური, რასისტული, თუ ჰომოფობიური გამწყობებით, მათ მიერ 14 ივლისს გამართული აქცია სწორედ ამგვარი განწყობების დემონსტრირება იყო.

განახლება: შსს-მ თათია დოლიძის მიმართ გაუპატიურების მუქარაზე გამოძიება დაიწყო.