მოკლედ: უკრაინის პრეზიდენტმა, ვოლოდიმირ ზელენსკიმ დავოსის მსოფლიო ეკონომიკურ ფორუმზე მსხვილი კომპანიების წარმომადგენლებს და ბიზნეს-ლიდერებს მიმართა, გააძლიერონ რუსეთის წინააღმდეგ სანქციები და დაეხმარონ მის ქვეყანას ეკონომიკის აღდგენაში.

  • ეს არის ზელენსკის პირველი ვიზიტი დავოსში მას შემდეგ, რაც ომი დაიწყო. გასულ წლებში ფორუმის მონაწილეებს ის ვიდეოთი მიმართავდა. ამჯერად კი შეხვედრები გამართა როგორც პოლიტიკურ, ისე — ბიზნეს ლიდერებთან.

დეტალები: დავოსის მსოფლიო ეკონომიკურ ფორუმზე გამოსვლისას, ზელენსკიმ თქვა, რომ პუტინმა მოიპარა "მშვიდობის 13 წელი".

"თუ ვინმე ფიქრობს, რომ ეს მხოლოდ უკრაინას ეხება, ის ფუნდამენტურად ცდება“,— თქვა ზელენსკიმ დავოსში 70 აღმასრულებელი დირექტორთან და ევროკომისიის პრეზიდენტთან, ურსულა ფონ დერ ლაიენთან შეხვედრის შემდეგ.

  • უკრაინის პრეზიდენტმა ხაზი გაუსვა რუსეთის წინააღმდეგ ეკონომიკური სანქციების გამკაცრების აუცილებლობას, მისი იარაღის წარმოების შეფერხების მიზნით.
  • ზელენსკიმ დავოსში აღმასრულებელ დირექტორებს მიმართა, უზრუნველყონ ომით განადგურებული ეკონომიკის აღსადგენად საჭირო ინვესტიციები.

”გააძლიერეთ ჩვენი ეკონომიკა და ჩვენ გავაძლიერებთ თქვენს უსაფრთხოებას,” — თქვა მან.

"რაც უფრო მეტ ფულს დაკარგავენ პუტინი და მისი მოკავშირეები, მით მეტად ინანებს ის ამ ომს“, — დასძინა ზელენსკიმ. "საბოლოოდ უნდა მოვიშოროთ ილუზია, რომ გლობალური ერთიანობა უფრო სუსტია, ვიდრე ერთი ადამიანის სიძულვილი“.

  • აშშ-ის პრეზიდენტის, ჯო ბაიდენის მცდელობა, უკრაინისთვის 60 მილიარდი დოლარის დამატებითი დახმარების გაწევის შესახებ, ჯერჯერობით, რესპუბლიკელი სენატორების გამო ვერ ხერხდება, თუმცა ზელენსკიმ თქვა, რომ დარწმუნებულია, რომ ამ ჩიხიდან გამოსავალი რამდენიმე კვირაში დასრულდება და სამხედრო ტექნიკის ახალ მარაგს მიიღებს.

ზელენსკის გამოსვლას ოვაციები მოჰყვა.

ბოლო ხაზი: მსოფლიო ეკონომიკური ფორუმი, ტრადიციულად, შვეიცარიის ქალაქ დავოსში იმართება.

  • ფორუმზე ეკონომიკური მნიშვნელობის თემებთან ერთად, განიხილება პოლიტიკური საკითხებიც, მათ შორის, ფორუმის ფარგლებში, მოლაპარაკებები გაიმართება ღაზის სექტორსა და უკრაინაში ომის დასრულების შესახებ.
  • დავოსის მსოფლიო ეკონომიკური ფორუმი 19 იანვრამდე გაგრძელდება.