ისლამისტური დაჯგუფება Hamas-ის მიერ თელ-ავივის ცენტრში განხორციელებული თავდასხმის შედეგად ისრაელის 4 მშვიდობიანი მოქალაქე გარდაიცვალა. ამის შესახებ ინფორმაციას CNN ავრცელებს.

პოლიციის ინფორმაციით, ორმა პალესტინელმა მებრძოლმა ქალაქის ცენტრში მდებარე სუპერმარკეტში, რომელიც ისრაელის თავდაცვის სამინისტროს გვერდით მდებარეობს, ცეცხლი ოთხშაბათს გვიან ღამით გახსნა, რის შედეგადაც ჯამში 13 ადამიანი დაშავდა. ინფორმაცია დაშავებულების შესახებ ადგილობრივმა საავადმყოფომაც გაავრცელა და აღნიშნა, რომ 4 ადამიანს, რომელთაგან ერთი ეჭვმიტანილია, ჯერ კიდევ სამედიცინო პროცედურები უტარდებათ.

სამართალდამცავებმა ტერორისტები მალევე დააკავეს, თუმცა დაჯგუფება ჰამასს მომხდარზე პასუხისმგებლობა ამ დრომდე არ აუღია. მიუხედავად ამისა, დაჯგუფებამ განაცხადა, რომ "ეს არის პირველი იმ უამრავი სიურპრიზიდან", რომელიც ისრაელის შეიარაღებული ძალების წინააღმდეგ რამადანის თვის განმავლობაში განხორციელდება.