სამოქალაქო პლატფორმა არაფობიას წევრი ორგანიზაციები, ხელისუფლებას სათანადო ზომების მიღებისკენ მოუწოდებენ, რათა დღეს დაგეგმილ ე.წ. ქართველთა მარშზე არ მოხდეს ძალადობის გამოვლინება რასისტულ და ქსენოფობიურ ნიადაგზე და უზრუნველყოფილი იყოს მანიფესტაციის კანონის ჩარჩოებში დარჩენა.

არაფობიას წევრი ორგანიზაციების განცხადებით, სანდრო ბრეგაძე ჯერ კიდევ თანამდებობაზე ყოფნისას გამოირჩეოდა განსაკუთრებული აგრესიით უმცირესობების ჯგუფების მიმართ.

"მის მიერ გავრცელებულ მიმართვაში ასევე ვხვდებით ფსევდო-ეროვნულ სენტიმენტებს და მოსახლეობისადმი მოწოდებას, მონაწილეობა მიიღონ საქართველოში მცხოვრები ეთნიკურად ირანელი, არაბი, აფრიკელი და ა.შ. ადამიანების ქვეყნიდან გაძევების მოთხოვნით დაგეგმილ ე.წ. ქართველთა მარშში. აღსანიშნავია, რომ მარშს სხვა რადიკალური ულტრანაციონალისტური ჯგუფებიც შეუერთდნენ," - ნათქვამია არა ფობიას წევრი ორგანიზაციების განცხადებაში.

არასამთავრობო ორგანიზაციების წევრები მიიჩნევენ, რომ ხელისუფლება ახალისებს ქვეყანაში არსებულ რასისტულ განწყობებს, ხოლო უცხოელებისგან მტრის ხატის შექმნამ, შესაძლოა სოციალური კონფლიქტები წარმოშვას:

"მცდელობა, საქართველოში მცხოვრები უცხოელებისაგან შეიქმნას მტრის ხატი, ხელს უწყობს საზოგადოებაში ქსენოფობიური და რასისტული განწყობების გაძლიერებას, რაც არსებითად ეწინააღმდეგება დემოკრატიული, პლურალური, სოლიდარული საზოგადოების მშენებლობას და იმ ღირებულებათა წესრიგს, რომელიც გარანტირებულია საქართველოს კონსტიტუციითა და ადამიანის უფლებათა სფეროში არსებული საერთაშორისო აქტებით. საქართველო მრავალეთნიკური და მრავალკონფესიური ქვეყანაა და ქსენოფობიურ და რასისტულ დისკურსს შეუძლია არსებითად დააზიანოს არადომინანტი ეთნიკური და რელიგიური ჯგუფების ინტეგრაციის პროცესი და სოციალური კონფლიქტები წარმოშვას".

არა ფობიას! წევრი ორგანიზაციები არიან:

• საქართველოს დემოკრატიული ინიციატივა (GDI);
• მედიის განვითარების ფონდი (MDF);
• კონსტიტუციის 42-ე მუხლი;
• ბალტიისა და შავი ზღვის ალიანსი - საქართველო (BBSA-Georgia);
• საქართველოს რეფორმების ასოციაცია (GRASS);
• თანასწორობის მოძრაობა (Equality Movement);
• საქართველოს ახალგაზრდა იურისტთა ასოციაცია (GYLA);
• საერთაშორისო გამჭვირვალობა - საქართველო (TI);
• იდენტობა;
• სამართლიანი არჩევნებისა და დემოკრატიის საერთაშორისო საზოგადოება (ISFED);
• ტოლერანტობისა და მრავალფეროვნების ინსტიტუტი (TDI).