10 ელექტრო და 20 დიზელზე მომუშავე ავტობუსით შეივსება ბათუმის საქალაქო სატრანსპორტო პარკი. ამის შესახებ ინფორმაციას ფინანსთა სამინისტრო ავრცელებს.

უწყების ცნობით, ეს ელექტრო ავტობუსების შეძენის კუთხით, პირველი პროექტია კავკასიაში. ახალი ავტობუსები აეროპორტი-ქალაქის ცენტრი/რკინიგზის სადგურის მარშრუტით იმოძრავებენ.

დღეს, 13 ივლისს აღნიშნული პროექტის შესახებ ფინანსთა მინისტრმა, დიმიტრი ქუმსიშვილმა და ევროპის რეკონსტრუქციისა და განვითარების ბანკში (EBRD) აღმოსავლეთ ევროპისა და კავკასიის მმართველმა დირექტორმა, ფრანსის მალიჟმა ხელი მოაწერეს სასესხო და საგრანტო შეთანხმებებს.

გარდა ამისა, გაფორმდა პროექტის მხარდაჭერის ხელშეკრულება ბათუმის მერიასა და ევროპის რეკონსტრუქციისა და განვითარების ბანკს შორის, რომელსაც ხელი ბათუმის მუნიციპალიტეტის მერმა გიორგი ერმაკოვმა მოაწერა.

ქუმსიშვილის განცხადებით, პროექტს მნიშვნელოვანი გარემოსდაცვითი და სოციალური ეფექტი ექნება და გაზრდის ბათუმში ურბანული ტრანსპორტის მობილობას.

ევრობანკის აღმოსავლეთ ევროპისა და კავკასიის მმართველი დირექტორის, ფრანსის მალიჟის თქმით, ეს არის EBRD-ის პირველი პროექტი, რომელიც ითვალისწინებს ელექტრო ავტობუსების შემოყვანას.