ბრაზილიაში სანტა-კატარინას ციხის დაცვას ახალი წევრები შეუერთდნენ. ამიერიდან, ადამიანებთან ერთად ციხეს ბატებიც დაიცავენ. ბატები ციხის პერიმეტრზე უკვე პატრულირებენ და ყურადღებით იცავენ ციხის კედლებს, რათა პატიმრებმა გაქცევა ვერ შეძლონ.

ბატები სხვა თანამშრომლებთან ერთად ციხის შიდა ეზოსა და გარე კედელთან უკვე გამოჩნდნენ. როგორც დაცვის თანამშრომლები აღნიშნავენ, სიფხიზლე ბატებს შესანიშნავ მცველებად აქცევს. თანამშრომლების თქმით, ამ საქმეში ბატები ძაღლებსაც კი სჯობნიან.

ფოტო: Reuters

"ჩვენ გვაქვს ელექტრონული მეთვალყურეობა, ადამიანების მიერ მეთვალყურეობა და ციხეს უკვე ბატებიც დარაჯობენ, რომლებმაც ძაღლები ჩაანაცვლეს", — აღნიშნავს ციხის დირექტორი.

ბატები ახალ სამსახურს კარგად შეეწყვნენ. დაცვის წევრები ახალ თანამშრომლებს უკვე სახელებითაც მიმართავენ, ბატები კი სახელის გაგონებაზე პასუხობენ. როგორც ციხის ადმინისტრაცია აღნიშნავს, ძაღლებთან შედარებით ბატების გაწვრთნა გაცილებით მარტივია, მოვალეობას კი ბატები თავს მშვენივრად ართმევენ.