რა ხდება: უნგრეთმა დაბლოკა უკრაინისთვის ევროკავშირის 50 მლრდ ევროს დახმარება.

  • ამის შესახებ მას მერე გახდა ცნობილი, რაც ევროკავშირმა განაცხადა, რომ უკრაინასთან გაწევრიანების მოლაპარაკებებს იწყებს.
  • უნგრეთის პრემიერ-მინისტრმა ბრიუსელში თქვა, რომ ბლოკის მიერ დახმარების გადაწყვეტილებას ვეტოს ადებს.

კონტექსტი: უკრაინისთვის ევროპისა და აშშ-ს დაფინანსებას კრიტიკული მნიშვნელობა აქვს.

გასულ კვირას, ზელენსკის ცოლმა, ოლენა ზელენსკამ BBC-სთან ინტერვიუში განაცხადა, რომ უკრაინელები სიკვდილის საფრთხის წინაშე დადგებიან, თუ დასავლეთის ქვეყნები მათ ფინანსურ მხარდაჭერას არ გააგრძელებენ.

  • უნგრეთი, რომელიც ახლო ურთიერთობას ინარჩუნებს რუსეთთან, დიდი ხანია, უკრაინის ევროკავშირში გაწევრიანების წინააღმდეგია, თუმცა გუშინ ბლოკის გადაწყვეტილებას, მოლაპარაკებების დაწყების თაობაზე, ვეტო არ დაადო.
  • მან თქვა, რომ კენჭისყრაში მონაწილეობა არ მიუღია.
  • ევროპის საბჭოს პრეზიდენტმა, შარლ მიშელმა განაცხადა, რომ შეთანხმება ერთსულოვანი იყო. ვოლოდიმირ ზელენსკიმ კი ევროკავშირის გადაწყვეტილება გამარჯვებად შეაფასა.

რა მოლოდინებია ფინანსურ დახმარებასთან დაკავშირებით: ორბანის გადაწყვეტილებაზე საუბრისას, ნიდერლანდების პრემიერ-მინისტრმა მარკ რუტემ თქვა:

  • "ჩვენ კიდევ გვაქვს დრო, უკრაინას არ ამოეწურება თანხა მომდევნო რამდენიმე კვირის განმავლობაში.
  • 26 ქვეყანა თანახმა ვართ, ვიქტორ ორბანი, ჯერჯერობით, არა. დარწმუნებული ვარ, რომ შევძლებთ მომდევნო წლის დასაწყისში, შეთანხმებას მივაღწიოთ. სავარაუდოდ, ეს იანვრის ბოლოსთვის მოხდება", — თქვა რუტემ.