როგორც ალბათ უკვე იცით, Warner Bros.-ის ახალ მიუზიკლში Wonka ვარსკვლავურ სამსახიობო შემადგენლობას ვიხილავთ: ტიმოთი შალამე, ოლივია კოლმანი, სალი ჰოუკინსი და ჰიუ გრანტიც კი. თუმცა, ამ უკანასკნელს ფილმის გადაღებებზე მაინცდამაინც კომფორტულად არ უგრძნია თავი.

მიუზიკლში, რომელიც როალდ დალის ცნობილი საბავშვო წიგნის ეკრანიზაცია გახლავთ, გრანტი უმპა-ლუმპას ასახიერებს — ვილი ვონკას შოკოლადის ქარხანაში დასაქმებულ პერსონაჟს. გმირის ეკრანზე გასაცოცხლებლად ნაირგვარი ტექნიკა იქნა გამოყენებული, მათ შორის, ანიმაცია. ეს კი გრანტისთვის არცთუ მოსახერხებელი ყოფილა.

"ეკლის გვირგვინის დადგმას ჰგავდა, ძალიან არაკომფორტული იყო", — აღნიშნავს მსახიობი უახლეს ინტერვიუში, სადაც გადასაღებ მოედანზე მიღებულ გამოცდილებაზე ჰკითხეს, — "ძალიან შევწუხდი და ეს ყველაფერი შემძულდა".

გრანტი აღნიშნავს, რომ გადაღებისას ვერ ხვდებოდა, საკუთარი სხეულით ეთამაშა თუ არა. "დამაკმაყოფილებელი პასუხი კი არასდროს მიმიღია", — ამატებს მსახიობი.

"სიმართლე გითხრათ, ჩემი სხეულით ნამოქმედარი საშინელება იყო, ამიტომ ყველაფერი ანიმაციით ჩანაცვლდა", — მათ შორის, უმპა-ლუმპას ცეკვაც.

ინტერვიუში გრანტმა იხუმრა, რომ როლს მხოლოდ თავისი ხუთი შვილის გამო დათანხმდა.

"ცოტათი მძულს კიდეც [ფილმებში მონაწილეობა], მაგრამ ბევრი შვილი მყავს და ფული მჭირდება", — დასძენს კინოვარსკვლავი.

გრანტს ასევე ჰკითხეს, ფილმის საბოლოო ვერსიის ნახვის შემდეგ თუ ჩათვალა, რომ მასში მონაწილეობა ღირდა. "დიდად არა", — უპასუხა მსახიობმა.

ვონკას პრემიერა 15 დეკემბერს შედგება.

ასევე იხილეთ: