რა ხდება: გამოცემა პოლიტიკოს სია, თუ ვინ არიან ყველაზე გავლენიანი ადამიანები ევროპაში, უკვე ცნობილია.

რატომ არის მნიშვნელოვანი: პოლიტიკო სიას ყოველწლიურად აქვეყნებს და რეიტინგს სამ კატეგორიად ჰყოფს — შემსრულებლები, დამრღვევები (ძირგამომთხრელები) და მეოცნებეები.

  • სიაში შემავალი ყველა ადამიანი განსხვავებული ტიპის ძალაუფლებას ფლობს.
  • თუ ვინ გახდებიან, ამ კატეგორიების მიხედვით, ყველაზე გავლენიანი პირები, დღეს საღამოს გახდება ცნობილი.

რა კატეგორიაში მოხვდა ბიძინა ივანიშვილი: დამრღვევების.

პოლიტიკო ყოფილ პრემიერ-მინისტრს ოლიგარქად მოიხსენიებს.

  • წერს, რომ თუ ივანიშვილს დავუჯერებთ, პოლიტიკა დატოვა და შავ ზღვაზე, დენდროლოგიურ პარკთან ახლოს უბრალო ცხოვრებით ცხოვრობს, "თუმცა ყველამ იცის, რომ საქართველოს უმდიდრესი ადამიანი (რომლის ქონება, დაახლოებით, ქვეყნის მშპ-ს მესამედია), მის მიერვე დაარსებული მმართველი პარტიის, "ქართული ოცნების" სადავეებს ხელიდან არ უშვებს, მისი მიზანია, საქართველო ევროკავშირის მოსაცდელი ოთახიდან გამოიყვანოს და კრემლის კლანჭებში მოაქციოს", — წერია მასალაში.
  • გამოცემა აღნიშნავს, რომ "სიღარიბეში დაბადებული" ივანიშვილი უმაღლესი განათლების მისაღებად მოსკოვში გაემგზავრა, 1990-იან წლებში უდიდესი ქონება დააგროვა, შემდეგ კი სამშობლოში დაბრუნდა და "ქართული ოცნება" დააარსა.

ივანიშვილის შესახებ აღნიშნულია ისიც, რომ გასულ წელს, საქართველომ უარი თქვა რუსეთისთვის სანქციების დაწესების შესახებ, მოხსნა პირდაპირი ფრენების აკრძალვა და საქართველოს პრეზიდენტის წინააღმდეგ, ევროპის დედაქალაქებში მოგზაურობის გამო, იმპიჩმენტიც კი წამოიწყო.

  • "ანალიტიკოსები ამბობენ, რომ ივანიშვილი დიდწილად არის პასუხისმგებელი საქართველოს პრო-მოსკოვურ პოზიციაზე, უკრაინაში რუსეთის მიერ ომის დაწყების შემდეგ. იმის მიუხედავად, რომ საქართველოს ტერიტორიის მეხუთედი კრემლის ძალების მიერ, ქვეყანა გადაიქცა სანქციების დამრღვევი პარალელური ექსპორტის ჰაბად რუსეთისთვის", — წერს გამოცემა.

პოლიტიკოს მიხედვით, თბილისი უკან იხევს ადამიანის უფლებების, კანონის უზენაესობასა და დემოკრატიის პრინციპების მიმართულებით — "სწორედ იმ მომენტში, როდესაც ბრიუსელი განიხილავს გაწევრიანების განაცხადს".

  • "ქართველების დიდი უმრავლესობა მხარს უჭერს ევროკავშირის წევრობას და სურთ, ქვეყანა დასავლეთის მიმართულებით წავიდეს. მას შემდეგ, რაც ბრიუსელმა 2022 წლის ივნისში წარადგინა 12 რეკომენდაცია, რომელიც ქვეყანამ უნდა განახორციელოს ბლოკში შესასვლელად, თბილისს აქვს მკაფიო გზა 2024 წელს, თუ მას სურს წინსვლა გაწევრიანების მოლაპარაკებებში. საკითხავია, დაუშვებს თუ არა ამას ივანიშვილი", — წერს პოლიტიკო.

დამრღვევების კატეგორიაში დასახელდა უნგრეთის პრემიერ-მინისტრი, ვიქტორ ორბანიც.