საქართველოდან გაუჩინარებული ჟურნალისტის, აფგან მუხტარლის ცოლი და ადვოკატი მისი საქმის მასალებს თბილისის პოლიციის მთავარ სამმართველოში ეცნობიან. მტკიცებულებების შესახებ On.ge მათ ესაუბრა.

აფგან მუხტარლის ადვოკატი, არჩილ ჩოფიკაშვილი ამბობს, რომ პირველად მტკიცებულებების გაცნობის შესაძლებლობა 13 ივნისს ჰქონდა. მისი თქმით, მტკიცებულებებშია ვიდეოჩანაწერი, სადაც ჩანს, როგორ მუხტარლი #4 მიკროავტობუსში ჯდება და სახლისკენ მიდის.

"ვითხოვდით, რომ ასლები გადმოეცათ მტკიცებულებების. ვინაიდან მოცულობითია საქმე, დაახლოებით 100 საათზე მეტია ვიდეოჩანაწერი, შეუცვლელია მისი ერთჯერადად სამუშაო დროს გაცნობა", - ამბობს ჩოფიკაშვილი და დასძენს, რომ დღეს 12 ივლისს დაიბარეს და უთხრეს, რონ საქმის გაცნობა კიდევ შეეძლოთ. მისი თქმით, მან არ იცის გადასცემენ თუ არა საქმის მასალებს.

აფგან მუხტარლის ცოლი, ლეილა მუსტაფაევა კი დამატებითი ვიდეოჩანაწერების გასაჯაროებას ითხოვს.

"ვიდეო, რომელშიც ჩანს, რომ აფგანი სამარშრუტო ტაქსიში ჯდება არაფერს არ ნიშნავს. მოვითხოვთ სხვა ვიდეო ჩანაწერებს, რომელშიც იქნება ასახული იყო თუ არა სხვა მანქანა მიმდებარედ, რომელიც შესაძლოა სამარშრუტო ტაქსის აედევნა. ჩვენ ისედაც ვიცოდით, რომ აფგანი სამარშრუტო ტაქსით ბრუნდებოდა სახლში, როდესაც მოიტაცეს," - განმარტავს მუსტაფაევა.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.