მოკლედ: ერთიანი ნაციონალური მოძრაობის თავმჯდომარემ, ლევან ხაბეიშვილმა ენმ-ის თბილისის ორგანიზაციის თავმჯდომარედ ზაზა გოგავა, აღმასრულებელ მდივნად — ირაკლი ნადირაძე წარადგინა.

რა თქვა ხაბეიშვილმა: "პარტიაში ეს გადაწყვეტილება იქნა მიღებული და მე პირადად მივიღე ეს გადაწყვეტილება, რომ ბატონი ზაზა გოგავა იქნება თბილისის "ნაციონალური მოძრაობის" პარტიის თავმჯდომარე, მას ჩემი მხრიდან ზედმეტი წარდგენა არ სჭირდება", — განაცხადა პარტიის თავმჯდომარემ.

ენმ-ის ნოემბრის გეგმები: პარტია აპირებს, გამართოს "დიდი შეკრება" 23 ნოემბერს, "ვარდების რევოლუციის" 20 წლის თავზე.

  • პარტიის ერთ-ერთ ლიდერი, დავით კირკიტაძე ამბობს, რომ იმავე აქციაზე შეაგროვებენ ხელმოწერებს მიხეილ სააკაშვილის მიერ ინიციირებულ "ერთიანობის მანიფესტის" შესახებ.
  • კირკიტაძის თქმით, შეკრების ორგანიზების პროცესში მათ წინააღმდეგობები ხვდებათ სახელმწიფოს მხრიდან:
  • "ჩვენ მივმართეთ არაერთ სახელმწიფო დაქვემდებარებაში მყოფ დაწესებულებას, როგორიც არის ახალი სპორტის სასახლე, ასევე ძველი სპორტის სასახლის იჯარით აღებისთვის მფლობელ კომპანიას და სამწუხაროდ, მათგან ჩვენ გვეთქვა უარი", — თქვა მან.

ბოლო ხაზი: კირკიტაძე აღნიშნავს, რომ მათ გეგმებს ხელისუფლება ხელს უშლის იმ ფონზე, როდესაც შეხვედრების გამართვის შესაძლებლობას აძლევს ძალადობრივი დაჯგუფების, ალტ ინფოს სახით რუსულ ძალებს, ხოლო პროდასავლურ ძალებს "გააფთრებულ წინააღმდეგობას" უქმნიან.