ბაქოს სამხედრო სასამართლომ ეთნიკურად სომეხ ვაგიფ ხაჩატრიანს, მთიანი ყარაბაღიდან, 15-წლიანი პატიმრობა მიუსაჯა. მას ბრალად ედება ომის დანაშაულის ჩადენა მთიანი ყარაბაღის პირველი ომის დროს.

ხაჩატრიანს ბრალად ედება ხოჯალისთან ახლოს, სოფელ მეშალში აზერბაიჯანელი მოსახლეობის მასობრივ მკვლელობაში მონაწილეობა. ბრალს ის არ აღიარებს.

რუსეთის ადამიანის უფლებათა დამცველი გუნდის, "მემორიალის" 1992 წლის რეპორტში ნათქვამია, რომ 1991 წლის 22 დეკემბერს, მეშალიში, სომხურმა ძალებმა სასტიკად იძალადეს მოსახლეობაზე. აზერბაიჯანის პროკურატურის ინფორმაციით, 25 აზერბაიჯანელი მოკლეს, 14 დაშავდა, 358 იძულებული გახდა, საცხოვრებელი ადგილი დაეტოვებინა.

68 წლის ხაჩატრიანი აზერბაიჯანში ივლისში, ლაჩინის საკონტროლო პუნქტთან დააკავეს, მთიან ყარაბაღსა და სომხეთს შორის, ვიდრე რეგიონზე კონტროლს აზერბაიჯანი აიღებდა. ის წითელ ჯვარს გულის ოპერაციის ჩასატარებლად წითელ ჯვარს ერევანში გადაჰყავდა.

მას ბრალი წაუყენეს გენოციდისა და მოსახლეობის იძულებით გადაადგილებისთვის. ხაჩატრიანს 14-დან 20 წლამდე პატიმრობა ემუქრებოდა, თუმცა, პროკურატურამ მისთვის 15-წლიანი პატიმრობა მოითხოვა.

შემაჯამებელ განცხადებაში ხაჩატრიანმა განაცხადა, რომ მეშალის მკვლელობებში მას მონაწილეობა არ მიუღია.

"მე ღმერთის მწამს. დაე, ღმერთმა დასაჯოს, ვინც ეს ჩაიდინა", — თქვა ხაჩატრიანმა და დაამატა, რომ მაშინ, როდესაც დამნაშავეები თავისუფლები არიან, სასამართლოს წინაშე მას უწევს დგომა.

მისი თქმით, როდესაც მასობრივი მკვლელობა მოხდა, მძღოლად მუშაობდა და ახლომდებარე სოფელ ბადარაში იმყოფებოდა.

სომხეთის ხელისუფლებაში არაერთხელ გააკრიტიკეს ხაჩატრიანის სამართლებრივი დევნა. ვერდიქტის გამოცხადების შემდეგ, სომხეთის ადამიანის უფლებათა დამცველმა დაგმო სასამართლო პროცესი და თქვა, რომ "არ იცავდნენ ადამიანის უფლებებთან დაკავშირებულ საერთაშორისო სამართლებრივ სტანდარტებს“.

მათ მოუწოდეს საერთაშორისო უფლებადამცველ ჯგუფებს, "დაუყოვნებლივ იმოქმედონ".

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.