სიტკომ Friends-ის მსახიობი და ჩენდლერის როლის შემსრულებელი მეთიუ პერი 28 ოქტომბერს 54 წლის ასაკში გარდაიცვალა. მსახიობი პარასკევს, 3 ნოემბერს, ლოს-ანჯელესში Forest Lawn-ის სასაფლაოზე დაკრძალეს, სადაც არაერთი ცნობილი ადამიანი, მათ შორის მაიკლ ჯექსონი და ელიზაბეტ ტეილორი არიან დაკრძალული.

დახურულ ცერემონიას მისი ოჯახი და Friends-ის მსახიობები — ჯენიფერ ენისტონი, კორტნი კოქსი, მეთ ლებლანკი, ლიზა კუდროუ და დევიდ შვიმერი ესწრებოდნენ. მეთიუს გარდაცვალებას შოუს ხუთეული საერთო განცხადებით გამოეხმაურა, რომელშიც ამბობდნენ, რომ ისინი ერთმანეთისთვის ოჯახი იყვნენ და მეგობრის დაღუპვით განადგურებულები არიან.

მსახიობი ლოს-ანჯელესში, საკუთარ სახლში, გარდაცვლილი იპოვეს, თუმცა ჯერჯერობით მისი გარდაცვალების მიზეზებზე ინფორმაცია ოფიციალურად არ დასტურდება.

პერის გარდაცვალების გამო მწუხარება სერიალის შემქმენელებმაც გამოხატეს — მათი თქმით, ძალიან გაუმართლათ, რომ მეთიუ მათი ცხოვრების ნაწილი იყო. მსახიობს Friends-ში ჯენისის როლის შემსრულებელი მეგი უილერიც დაემშვიდობა და თქვა, რომ სიხარული, რომელიც პერიმ მსოფლიოს მოუტანა, იცოცხლებს.

პერის ოჯახის განცხადებით, მეთიუს ტრაგიკული დაღუპვის შემდეგ განადგურებულები არიან და ძალიან აფასებენ სიყვარულს, რომელსაც საზოგადოებისგან იღებენ.

სოციალურ ქსელებში მეთიუ პერის შესახებ პოსტები არ წყდება, ცოტა ხნის წინ კი ფანები ნიუ-იორკში იმ ბინასთან შეიკრიბნენ და ყვავილები მიიტანეს, სადაც Friends-ში მეთიუს პერსონაჟი ჩენდლერი ცხოვრობდა.

მეთიუ პერი გარდაცვალებამდე 1 წლით ადრე პოდკასტში იყო მიწვეული, რომელშიც ცხოვრებისა და კარიერის შესახებ ვრცლად ისაუბრა. ინტერვიუში Friends-ის მსახიობს ისიც ჰკითხეს, თუ როგორ სურდა სიკვდილის შემდეგ ადამიანებს გეხსენებინათ, რაზეც ასე უპასუხა:

"როცა მოვკვდები, არ მინდა, Friends იყოს პირველი, რაც გაახსენდებათ. მსურს, პირველი ის გაახსენდეთ, რომ ადამიანებს ვეხმარებოდი და ვაპირებ, დარჩენილი ცხოვრება ამის დასამტკიცებლად ვიცხოვრო", — განაცხადა მეთიუ პერიმ.

იხილეთ ასევე: