რას წერს საკუთარ ქონებასა და შემოსავლებზე ღარიბაშვილი დეკლარაციაში

30 ოქტომბერს პრემიერ-მინისტრმა, ირაკლი ღარიბაშვილმა ქონებრივი დეკლარაცია განაახლა.

დეტალები: ღარიბაშვილს აქვს სამი ბინა, ავტომობილი, ავტოფარეხი და არასაცხოვრებელი ფართი თბილისში. მის საკუთრებაშია:

2019 წელს ნაყიდი, იმავე წელს გამოშვებული ავტომობილი — აუდი A8. ამისთვის საქართველოს პრემიერ-მინისტრმა 75 620 ევრო დახარჯა. დეკლარაციაში მიუთითებს, რომ აუდი განვადებით იყიდა.
2009 წელს, 100 000 ლარად ნაყიდ ბინასა და 10 000 ლარად ნაყიდ ავტოფარეხს ფლობს გაგარინის ქუჩაზე;
2011 წელს, ორი ბინა იყიდა მოსაშვილის ქუჩაზე. აქედან ერთის ღირებულება იყო 185 000 ლარი, მეორე ბინის ფასი დეკლარაციაში არ მიუთითებია.
2011 წელსვე, 6 711 ლარად ნაყიდი აქვს არასაცხოვრებელი ფართი ასევე, მოსაშვილზე.
221 000 ლარი აქვს მითითებული გრაფაში — საქართველოში ან სხვა ქვეყანაში თქვენი ან ოჯახის წევრის საკუთრებაში არსებული უძრავი ქონება.
მოგზაურობის ხარჯი: 8 868 დოლარი.
დანაზოგი: 40 000 ლარი.
წლიური ხელფასი: 41 004 ლარი.
ივანიშვილის ბანკის ვალი: ცოლთან, ნუნუ თამაზაშვილთან ერთად არის 137 120 ლარის თანამსესხებელი — მათ ივანიშვილის მიერ დაფუძნებული ქართული ბანკიდან სესხი აიღეს 2019 წელს, ბაკურიანში, ნუნუ თამაზაშვილის სახლის მშენებლობისთვის.
საჩუქარი მშობლებისგან: 180 000 ლარი.

სტრიქონებს შორის: ღარიბაშვილი, მშობლებისგან "საჩუქრად" მიღებულ დიდი ოდენობის თანხებს გასული წლების დეკლარაციებშიც მიუთითებდა: ეს იყო 150 000 ლარი 2022 წლის დეკლარაციის მიხედვით და ასევე, 150 000 ლარი — 2021 წლის დეკლარაციის მიხედვით.

კონტექსტი: 2023 წლის სექტემბერში, ტვ პირველზე გავიდა ნოდარ მელაძის შაბათის საგამოძიებო სიუჟეტი, საიდანაც ცნობილი გახდა, რომ ღარიბაშვილმა, აშშ-ში შვილთან ერთად პირადი ფრენისთვის სამთავრობო თვითმფრინავი გამოიყენა.

ამას მოჰყვა მთავრობის სტრატკომის განმარტება, რომ ამისთვის პრემიერ-მინისტრს საბიუჯეტო თანხები არ გამოუყენებია.
სტრატკომის განცხადებამ ახალი კითხვა გააჩინა: როგორ შეუძლია ღარიბაშვილს, დაახლოებით, 100 000 ლარის გადაიხადოს აშშ-ში პირადი ფრენისთვის, როდესაც მისი დეკლარირებული შემოსავლების მიხედვით, მისი წლიური შემოსავალია 41 000 ლარი.

ნუნუ თამაზაშვილის ქონება: 2023 წლის დეკლარაციის მიხედვით, ნუნუ თამაზაშვილი ფლობს 2018 წელს ნაყიდ, იმავე წელს გამოშვებულ ავტომობილს RANGE ROVER VELAR-ს, რისთვისაც, დეკლარაციის მიხედვით, 46 000 ევრო გადაიხადა.

მიწა ბაკურიანში: ღარიბაშვილის ცოლი ფლობს 1530 კვ.მ ფართის ნაკვეთს, რაშიც 76 500 დოლარი გადაიხადა.
შვილების სწავლის ხარჯები: დეკლარაციის მიხედვით, ამ ხარჯებს ნუნუ ღარიბაშვილი ფარავს: 12 000 ლარი ნიკოლოზ ღარიბაშვილის სწავლისთვის, 6 698 ლარი ანდრია ღარიბაშვილის სწავლისთვის და ასევე, ანდრია ღარიბაშვილის სწავლის გასავალში აქვთ მითითებული დამატებით 13 545 ლარი, ხოლო გაბრიელ ღარიბაშვილის სწავლის ხარჯი 9 534 ლარია.

ბოლო ხაზი: 2022 წელს ცნობილი გახდა, რომ ნუნუ თამაზაშვილს ბაკურიანში 5 958 კვ.მ ტყე იჯარით გადაეცა.