მოკლედ: 2023 წლის 2 ნოემბერს საქართველოს მართლმადიდებელი ეკლესიის სინოდის სხდომაზე განხილული საკითხების შესახებ "წმინდა სინოდის განჩინება" საპატრიარქოს ვებ-გვერდზე გამოაქვეყნეს.

საპატრიარქოს მიხედვით,

  • შეხვედრას საქართველოს მართლმადიდებლური ეკლესიის პატრიარქი, ილია მეორე თავმჯდომარეობდა.
  • მან მოკლედ დაახასიათა მსოფლიოში და საქართველოში არსებული მდგომარეობა,
  • და განსახილველი საკითხების წარსადგენად, სიტყვა მიტროპოლიტ შიოს გადასცა. განჩინებაში მიტროპოლიტი შიო მოხსენიებულია, როგორც "საპატრიარქო ტახტის მოსაყდრე."

დეტალები: "წმინდა სინოდის სხდომის განჩინებაში" დაწერეს, რომ "უკრაინასა და წმინდა მიწაზე მიმდინარე საომარი მოქმედებების შესახებ", სინოდის საერთო პოზიცია ჩამოყალიბდა.

ამონარიდები განჩინებიდან:

  • "უკრაინაში რუსეთის მიერ საომარი მოქმედებების დაწყების პირველივე დღეებიდან საქართველოს კათოლიკოს-პატრიარქმა გაავრცელა მიმართვა კონფლიქტის დაუყოვნებლივი შეწყვეტის აუცილებლობის შესახებ, რაც, წინააღმდეგ შემთხვევაში, მეტად მძიმე შედეგებს მოიტანდა.
  • დღეს კი, როდესაც ახლო აღმოსავლეთში განვითარებული მოვლენები უფრო და უფრო მასშტაბურ სახეს იღებს, ნათელია, რომ იქმნება გლობალურად ფეთქებადსაშიში გარემო, რაც მთელ მსოფლიოს დიდი საფრთხის ქვეშ აყენებს.
  • უკრაინასა და ღაზის სექტორში წარმოებული ომების შედეგად უკვე დიდია მსხვერპლი.
  • ჯარისკაცებთან ერთად იღუპებიან უდანაშაულო ადამიანები, ბავშვები და მოხუცები, ნადგურდება ინფრასტრუქტურა, საცხოვრებელი, რელიგიური თუ სხვა დანიშნულების შენობა-ნაგებობები;
  • ზოგადად, ადგილი აქვს რელიგიური ნიშნით ძალადობასაც."

სტრიქონებს შორის: საქართველოს მართლმადიდებლურ ეკლესიას ჯერ ისევ არ დაუფიქსირებია პოზიცია უკრაინის ეკლესიის ავტოკეფალიის ტომოსთან დაკავშირებით.

  • უკრაინის ავტოკეფალიის ტომოსს 2019 წლის 5 იანვარს მოაწერა ხელი მსოფლიო პატრიარქმა, ბართლომემ.

ბოლო ხაზი: ისინი გამოხატავენ მწუხარებას და თანაგრძნობას ომის შედეგად დაზარალებულთა მიმართ. "ტერორი, სისასტიკე, უსამართლობა... ცალსახად დასაგმობია და მისი პირდაპირი ან ირიბი მხარდაჭერა, — ცივილიზებული სამყაროსათვის მიუღებელი", — წერია 2023 წლის 2 ნოემბრის განჩინებაში.