იუსტიციის მინისტრი რატი ბრეგაძე ამბობს, რომ ავერსის კლინიკიდან პატიმრების გაქცევის საქმეზე გამოძიება მიმდინარეობს.

  • მინისტრის თქმით, მისი უწყება, შსს-სთან ერთად, ატარებს ყველა ღონისძიებას მათ დასაკავებლად, თუმცა, მოუწოდებს პატიმრებს, "გონს მოეგონ, ჩაბარდნენ და ამით სცადონ პასუხისმგებლობის შემცირება".
  • რატი ბრეგაძე, ასევე, შეახსენებს პატიმრების ოჯახის წევრებს და პირებს, რომლებსაც მათთან შეიძლება ჰქონდეთ კავშირი, რომ დამნაშავეებისთვის ნებისმიერი სახის ხელშეწყობა არის მძიმე დანაშაული.
  • "თუ ვინმე შეუწყობს ხელს მათ მიმალვაში, იქნებიან კანონის სრული სიმკაცრით დასჯილნი,"— თქვა მინისტრმა.

ბრეგაძე, ასევე, ამბობს, რომ თუ გამოიკვეთება მისი თანამშრომლების მხრიდან სამართალდარღვევა, მათი პასუხისმგებლობაც აუცილებლად დადგება.

რა მოხდა დღეს ავერსში: დაახლოებით, 13 საათზე, კლინიკიდან გაიქცა სამი პატიმარი, რომელიც სასჯელაღსრულების დაწესებულიდან გამოკვლევებისთვის ჰყავდათ მიყვანილი.

  • როგორ მოახერხეს მათ გაქცევა, უცნობია. ასევე, არ არის ცნობილი, თუ რა დანაშაულის გამო იხდიდნენ ისინი სასჯელს.
  • მინისტრი ამბობს, რომ ამ ინფორმაციის გავრცელება ხელს შეუშლის გამოძიებას, თუმცა მოგვიანებით დეტალებს საზოგადოებას აცნობებენ.