სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.

კითხვის გასაადვილებლად, OC Media-ს რედაქცია ამჯობინებს, არ გამოიყენოს ისეთი ტერმინები, როგორიცაა "დე ფაქტო", "არაღიარებული" ან "ნაწილობრივ აღიარებული", როდესაც სტატია ეხება ოკუპირებულ აფხაზეთს ან ე.წ. სამხრეთ ოსეთს, ასევე, მთიან ყარაბაღს. ეს არ ასახავს რედაქციის პოზიციას მათ სტატუსთან დაკავშირებით.

ცნობილი გახდა, ვინ არის რუსი ინვესტორი, რომელიც ოკუპირებული სოხუმის აეროპორტის აღდგენას გეგმავს — ის რუსეთის ყოფილი შს მინისტრის და ქვეყნის უშიშროების საბჭოს მდივნის მოადგილის, რაშიდ ნურგალიევის შვილია.

პარასკევს, აფხაზეთის ეკონომიკის სამინისტრომ და რუსეთის ეკონომიკის განვითარების სამინისტრომ განაცხადეს, რომ სადავო ტენდერი მოსკოვში ახლად დაარსებულმა კომპანიამ "ინფრასტრუქტურულმა განვითარებამ" მოიგო. კომპანიის მფლობელი ნურგალიევის შვილია, მასაც რაშიდ ნურგალიევი ჰქვია.

ბიზნესმენის მამა რუსეთის უშიშროების საბჭოს მდივნის მოადგილეა და ის, უკრაინაში რუსეთის შეჭრის ფონზე, დასავლეთისგან სანქცირებულ პირებს შორის არის.

რუს ინვესტორთან გარიგებამ, აეროპორტის აღდგენასთან დაკავშირებით, გააჩინა შიში, რომ შესაძლოა, აფხაზეთი აღმოჩნდეს ვალში, რამაც ის ე.წ. სუვერენიტეტის დაკარგვამდე მიიყვანოს.

ნურგალიევმა განაცხადა, რომ აეროპორტის აღდგენა, რომელიც 1992 წლის შემდეგ აღარ მუშაობს, რუს ტურისტებს აფხაზეთში მოგზაურობას გაუმარტივებს.

"რუსი ტურისტების ინტერესი აფხაზეთის კურორტებისადმი წლიდან წლამდე იზრდება", — განაცხადა ნურგალიევმა და აღნიშნა, რომ თანამედროვე აეროპორტი საშუალებას მისცემს აფხაზეთის ტურისტულ პოტენციალს, სრულად იქნეს რეალიზებული.

კომპანია "ინფრასტრუქტურული განვითარების" გენერალურმა დირექტორმა, სერგეი გიბკოვმა თქვა, რომ კომპანია გეგმავს, სარესტავრაციო სამუშაოებთან ერთად, აეროპორტის ახალი კომპლექსიც ააშენოს.

აეროპორტის გახსნა 2024 წლის ბოლოსთვის იგეგმება.

განცხადებამ აფხაზეთის ოპოზიციასა და სამოქალაქო საზოგადოებაში კრიტიკა გამოიწვია.

ჟურნალისტმა და პოლიტიკურმა მიმომხილველმა იზიდა ჭანიამ ტენდერი 2010 წლის რკინიგზის პროექტს შეადარა — ჩაშლილ ტენდერს, რომელმაც "ქვეყანა დიდ ვალში ჩაძირა".

თუმცა, აეროპორტის აღდგენას მხარს ბევრი უჭერს. აფხაზი მეწარმის, ასტამურ ლაკაშიას თქმით, აეროპორტი შექმნის უამრავ ახალ სამუშაო ადგილს და ინფრასტრუქტურას.