თავისუფალი დემოკრატების აღმასრულებელი მდივანი, ლევან სამუშია ხელისუფლება მოუწოდებს, თურქეთს არ გადასცეს დემირელის კოლეჯის მენეჯერი, მუსტაფა ემრე ჩაბუქი, რომელსაც ლტოლვილთა სამინისტრომ 7 ივლისს ლტოლვილის სტატუსის მინიჭებაზე უარი უთხრა.

"საქართველოს ხელისუფლების, კერძოდ ლტოლვილთა და განსახლების სამინისტროს დღევანდელი გადაწყვეტილება მუსტაფა ემრე ჩაბუქის საქმესთან დაკავშირებით არის სამარცხვინო ხელისუფლების სამარცხვინო გადაწყვეტილება და ჩვენ თვალნათლივ ვხედავთ, როგორ გადაიქცა საქართველოს ხელისუფლება საერთაშორისო დონის უფლებადამრღვევად“, - განაცხადა თავისუფალი დემოკრატების აღმასრულებელმა მდივანმა, ლევან სამუშიამ დღეს გამართულ ბრიფინგზე.

ლევან სამუშია მოუწოდებს ხელისუფლებას, ჩაბუქი არ გადასცეს თურქეთის ხელისუფლებას, რადგან ამით დაზარალდება ქვეყნის რეპუტაცია: "ძალიან მალე ჩვენ გავხდებით მიუღებელი და უფრო არასანდო პარტნიორები. მუსტაფა ემრე ჩაბუქის საქმესთან ერთად გვაქვს მუხთარლის საქმე, რომელიც უმძიმეს მდგომარეობაში აგდებს საქართველოს ხელისუფლებას“.

თავისუფალი დემოკრატების აღმასრულებელი მდივანი ამბობს, რომ ხელისუფლების წარმომადგენლებმა კარგად იცოდნენ, რომ მუსტაფა ემრე ჩაბუქს თავის მცირეწლოვან შვილებთან ერთად ემუქრებოდნენ სიცოცხლის მოსპობით და ამის მტკიცებულებები პროკურატურას აქვს:

"გაუგონარია, რომ სწორედ ამ ადამიანებს ხელისუფლება არ აძლევს ლტოლვილის სტატუსს, და გვეუბნება, რომ თურქეთის ციხეებში თურმე იდეალურად არის საქმე, თურმე ეტაპობრივად ვითარდება თურქული მართლმსაჯულება და ადამიანის უფლებები თურქეთში. თურქეთი საერთაშორისო დონის უფლებადამრღვევად არის ქცეული და ჩვენც მათ რიგებში ვეწერებით. მოვუწოდებ ხელისუფლებას შეცვალოს ეს უღირსი გადაწყვეტილება და საბოლოოდ არ მოახდინოს მუსტაფა ემრე ჩაბუქის ექსტრადირება".

სამუშიას მოსაზრებით, დღეს საქართველოს ხელისუფლებამ, ირიბად აღიარა ის, რასაც არ აღიარებს დასავლური სამყარო, რომ ფეტო და ფეთულა გიულენი არიან ტერორისტული ორგანიზაციები, რასაც არ აღიარებს გერმანია, საფრანგეთი და ამერიკის შეერთებული შტატები.

"გარკვეულწილად ირიბად, სოზარ სუბარის უწყებამ და ქართულმა ხელისუფლებამ ეს უკვე აღიარა. საქართველოს ხელისუფლება დღევანდელი გადაწყვეტილებით იქცა საერთაშორისო დონის უფლებადამრღვევად“, - ნათქვამია სამუშიას განცხადებაში, რომელიც პარტიის პრესსამსახურმა გაავრცელა.

მუსტაფა ემრე ჩაბუქი თურქეთის მხარის მოთხოვნით საქართველოში 24 მაისს დააკავეს. მას თბილისის საქალაქო სასამართლომ წინასაექსტრადიციო სამთვიანი პატიმრობა შეუფარდა. თურქეთის ხელისუფლება ჩაბუქს, რომელიც უკვე ათ წელიწადზე მეტია საქართველოში ცხოვრობს ოჯახთან ერთად, ფეტულა გიულენის ორგანიზაციასთან თანამშრომლობაში ადანაშაულებს. აღნიშნული ორგანიზაცია თურქეთის ხელისუფლების მიერ მიჩნეულია 2016 წლის 15 ივლისის გადატრიალების მცდელობის მთავარ შემოქმედად. ჩაბუქი ბრალდებებს უარყოფს. ჩაბუქსა და მის ოჯახს საქართველოს ხელისუფლებამ დღეს ლტოლვილის სტატუსზე უარი უთხრა.