რა ხდება: ჩეჩნეთის ლიდერის, რამზან კადიროვის შვილს, რომელმაც დაკავებულ ნიკიტა ჟურაველს სცემა და შემდეგ ვიდეო სოციალური ქსელით გაავრცელა, თათრეთის მეორე ყველაზე მნიშვნელოვანი ჯილდო გადასცეს.

  • დეტალები: ჯილდო ადამ კადიროვმა "ერთა და კონფესიათა შორის მშვიდობისა და თანხმობისთვის მნიშვნელოვანი წვლილის გამო" მიიღო.
  • კადიროვის დაჯილდოების შესახებ ინფორმაცია მისმა ბიძამ, დუმის დეპუტატმა ჩეჩნეთიდან, ადამ დელიმხანოვმა გაავრცელა.
  • ჯილდო ადამ კადიროვს პირადად თათრეთის ლიდერმა, რუსტამ მინახინოვმა გადასცა.

სტრიქონებს შორის: 6 ოქტომბერს, ადამ კადიროვს ჩეჩნეთის გმირის წოდება მიანიჭეს.

  • მანამდე 2 კვირით ადრე კი მისმა მამამ გამოაქვეყნა ვიდეო, სადაც ადამ კადიროვი ვოლგოგრადელ აქტივისტს, ნიკიტა ჟურაველს სცემს.
  • "სცემა და სწორადაც მოიქცა," - თქვა შვილის საქციელის შესახებ ჩეჩნეთის ლიდერმა.

ვინ არის ნიკიტა ჟურაველი: მაისში, 19 წლის აქტივისტმა, ნიკიტა ჟურაველმა ვოლგოგრადის საკათედრო მეჩეთის მიმდებარე ტერიტორიაზე ყურანი დაწვა და ამის ვიდეო გადაიღო.

  • ჟურაველი დააკავეს და შემდეგ გაავრცელეს "აღიარება", რომ ყურანის დაწვისას მოქმედებდა უკრაინის სპეცსამსახურების მითითებით, თანხის სანაცვლოდ.
  • მოგვიანებით ჟურაველი გროზნოში გადაიყვანეს, სადაც მას ადამ კადიროვმა სცემა.