რამდენიმე დღის წინ ცნობილი გახდა, რომ HBO-ს სერიალში, True Detective, მესამე სეზონში მთავარ როლს, სავარაუდოდ, მაჰერშალა ალი შეასრულებს.

როგორც გაირკვა, ამავე სერიალში უარყოფითი როლის შესასრულებლად რამდენიმე მსახიობს გაუგზავნეს მოწვევა, მათ შორის არის ჯულია რობერტსიც.

პარალელურად ვრცელდება ინფორმაცია იმის შესახებაც, რომ მესამე სეზონში თამაში სურთ ისეთ მსახიობებს, როგორებიც არიან რაიან გოსლინგი, ბენ აფლეკი, ჯოდი ფოსტერი, ქეისი აფლეკი, ჯარედ ლეტო, ემი ადამსი, ჯესიკა ჩესტეინი და მელისა მაკარტნიც კი.

რაც შეეხება ჯულია რობერტსს, გარდა იმისა რომ 2017 წლის ნოემბერში მისი მონაწილეობით რ. ჯ. პალაციოს "საოცრების" ეკრანიზაცია გამოვა, HBO-მ ოფიციალურად დაადასტურა, რომ არხი ახალი სერიალის, დღეს ყველაფერი შეიცვლებას, გადაღებებს დაიწყებს, რომელშიც მთავარ როლს ჯულია შეასრულებს.

გარდა ამისა, ცოტა ხნის წინ გავრცელდა ინფორმაცია, რომ ჯულია რობერტსის მონაწილეობით კიდევ ერთი სერიალი გამოვა, რომელსაც Mr. Robot-ის შემქმნელი გადაიღებს.

რაც შეეხება კინოს, 49 წლის მსახიობს აქაც დიდი გეგმები აქვს, მსახიობის სამომავლო პროექტების ჩამონათვალში ხუთი ფილმია, მათ შორის მნიშვნელოვანი წვრილმანები, სადაც ვაიოლა დევისთან ერთად ითამაშებს.

შესაბამისად ჯერ-ჯერობით უცნობია დათანხმდება თუ არა რობერტსი HBO-ს კიდევ ერთ სერიალში მონაწილეობას.