ბათუმის მკვიდრი, კუპატას სახელით ცნობილი უსახლკარო ცუგა დაიღუპა. კუპატა მთელმა საქართველომ სოციალურ ქსელში გავრცელებული ვიდეოთი გაიცნო, რომელშიც ის ბავშვებს ზებრაზე გადასვლაში ეხმარებოდა და ავტომობილის უყურადღებო მძღოლებს უყეფდა.

ამის შემდეგ ცუგა ბათუმში შენობის კედელზე უზარმაზარი სტენსილითაც გამოსახეს. აჭარის ტურიზმისა და კურორტების დეპარტამენტის თანამშრომლებმა სახლი უყიდეს, მალევე კი ვარსკვლავიც გაუხსნეს, როგორც ხალხის რჩეულს.

ცუგას ჯანმრთელობის პრობლემები ჰქონდა, გუშინ კი მისი მდგომარეობა დამძიმდა. ინფორმაცია კუპატას სახელით შექმნილმა ფეისბუქგვერდმა გაავრცელა.

"ლეგენდარულმა კუპატამ თითქმის 10 წლის შემდეგ დაგვტოვა. ჩვენი პატარა მეგობარი სამყარომ ერთი ვიდეოს დამსახურებით გაიცნო და მაშინვე ყველას თავი შეაყვარა. ჩვენი ურთიერთობა და სიყვარული კი ბევრად ადრე დაიწყო.
ალბათ უკვე ყველამ იცით, რომ კუპატას ჯანმრთელობის პრობლემები ჰქონდა, რომელსაც დიდხანს ვებრძოდით. გუშინ მისი მდგომარეობა დამძიმდა და დაგვემშვიდობა.
მადლობა თქვენ, კუპატას ერთგულ მეგობრებსა და გულშემატკივრებს, სიყვარულისა და მუდმივი მხარდაჭერისთვის. კუპატამ დიდი სიყვარული და ბევრი ტკბილი მოგონება დაგვიტოვა. პატარა მეგობარო, არასოდეს დაგვავიწყდები", — წერია პოსტში.