კენიელი კაცი, რომელსაც კვალიფიკაციის გარეშე საადვოკატო საქმიანობის განხორციელებაში ბრალი ედება, აცხადებს, რომ უდანაშაულოა და თავის მხარდაჭერებს მადლობასაც უხდის. კაცს, რომელიც ადვოკატ ბრაიან მვედას სახელით არაერთ პროცესზე გამოსულა და დაზარალებულებს იცავდა, ცოტა ხნის წინ პოლიციაში უჩივლეს.

საჩივრის მიხედვით, "ყალბმა ადვოკატმა" ნამდვილი ადვოკატის იდენტობა მოიპარა და პროცესებზე მისი სახელით გამოდიოდა. კაცმა სასამართლოში ათობით პროცესი უკვე მოიგო იმის მიუხედავად, რომ რეალურად ადვოკატობის უფლება არ ჰქონდა. მკაცრი შეფასებების მიუხედავად, ბრალდებულ კენიელ კაცს საკმაოდ ბევრი მხარდამჭერი გამოუჩნდა.

გარდა მოქალაქეებისა, კენიელ კაცს ადგილობრივმა ორგანიზაციებმა და პოლიტიკოსებმაც დაუჭირეს მხარი. კენიის პროფკავშირების ცენტრალურმა ორგანიზაციამ ბრალდებულს "ბრწყინვალე გონების" პატრონი უწოდა, რომელმაც წარმატების მიღწევა "ტრადიციული კვალიფიკაციის გარეშეც" შეძლო. კენიის დედაქალაქ ნაირობის ყოფილმა გუბერნატორმა კი კაცთან ერთად ვიდეო გამოაქვეყნა.

ვიდეოში ყოფილი გუბერნატორი ბრალდებულ კაცს იცავს და ამბობს, რომ ის ტერორისტი არ არის და არც არავინ მოუკლავს. თავად ბრალდებული კი თავის მხარდამჭერებს მადლობას უხდის და იმედოვნებს, რომ უდანაშაულობის დამტკიცებას ძალიან მალე შეძლებს.

მიუხედავად ასეთი მხარდაჭერისა, ბრალდებულს სასამართლოს წინაშე გამოსვლა მაინც მოუწევს. ადგილობრივი პოლიციის თქმით, ეს გამონაკლისი შემთხვევა არ არის, რადგან ბოლო პერიოდში არაკვალიფიციური პირები კენიის სასამართლოს წინაზე ადვოკატების როლს ხშირად ირგებენ.