მოკლედ: დღეიდან, 16 ოქტომბრიდან, ქვეყნის მასშტაბით, გრიპის საწინააღმდეგო ვაქცინაცია დაიწყო.

დეტალები: რისკჯგუფებისთვის — ადამიანებისთვის დაავადების გართულების მომატებული რისკით, ვაქცინაცია უფასოა.

• ჯანდაცვა ამბობს, რომ სახელმწიფომ შეიძინა 200 000 დოზა, Abbott Biologicals B.V.-ის წარმოების, ოთხკომპონენტიანი ვაქცინა.
• და ეს პრეპარატი მორგებულია იმ შტამებზე, რომელთა ცირკულაცია გრიპის სეზონზეა მოსალოდნელი.
• სეზონურ გრიპზე აცრის სერვისის მიმწოდებელი დაწესებულებების ჩამონათვალი იხილეთ აქ.

რატომ არის მნიშვნელოვანი:

თსსუ-ს პროფესორი, იაშვილის ბავშვთა ცენტრალური საავადმყოფოს სამედიცინო დირექტორი, ივანე ჩხაიძე, განმარტავს, რომ დეკემბრიდან გრიპის შემთხვევები მოიმატებს და ოქტომბრის შუა რიცხვებში იმუნიზაციის შემთხვევაში, რისკის ჯგუფში შემავალი პირები გართულებებისგან დაცულები იქნებიან.

• "გრიპის გავრცელება პიკს დეკემბერ-იანვარში აღწევს-ხოლმე, შესაბამისად, იმ დროისთვის ორგანიზმს მაქსიმალური დაცვა უნდა ჰქონდეს.
• გრიპის ვაქცინა გაკეთებიდან 2 კვირაში იწყებს მოქმედებას, ასე რომ, თუ ახლა, ოქტომბრის შუა რიცხვებში გაიკეთებთ გრიპის საწინააღმდეგო ვაქცინას, პირველი ნოემბრიდან თქვენი ორგანიზმი იქნება სრულად მზად გრიპის ვირუსის წინააღმდეგ საბრძოლველად, პიკის პერიოდში", — გვითხრა ივანე ჩხაიძემ.

ვისთვის არის რეკომენდებული გრიპის ვაქცინა

ექიმი განმარტავს, რომ გრიპის ვაქცინა არ არის უნივერსალური და არ არის რეკომენდაცია, ყველამ გაიკეთოს.

გვითხრა, რომ გრიპზე იმუნიზაციის ძირითადი სამიზნეა რისკის ჯგუფები, ვისთვისაც, გრიპის ვირუსით ინფიცირების შემთხვევაში, გართულებების ალბათობა მაღალია.

ვინ მოიაზრებიან რისკჯგუფებში:

დაავადებათა კონტროლის ეროვნული ცენტრის ინფორმაციით, 2023-2024 წლების გრიპის სეზონისათვის, ქვეყანაში გრიპის ვაქცინაციის მიზნით, მაღალი რისკის ჯგუფებად განისაზღვრა სპეციფიკური ქრონიკული დარღვევების მქონეთაგან:

• დიაბეტის მქონე პირები;
• დიალიზზე მყოფი პირები;
• C ჰეპატიტის მქონე პირები (მხოლოდ მკურნალობაზე მყოფნი);
• აივ ინფექცია/შიდსის მქონე პირები;
• ორგანოგადანერგილი და მუკოვისციდოზის დაავადების მქონე პირები;
• აგრეთვე, 60 წლის და უფროსი ასაკის ხანდაზმული პირები;
• ორსულები;
• ზოგადსაგანმანათლებლო დაწესებულების (სკოლები) პედაგოგები;
• ბავშვთა (მ.შ. მცირე საოჯახო ტიპის) და მოხუცთა თავშესაფრების ბენეფიციარები და მათი მომვლელი პერსონალი;
• სავალდებულო ვაქცინაციას დაქვემდებარებული მედპერსონალი.

რა ვირუსები ცირკულირებს ახლა?

• "ლაბორატორიული ნიმუშები აჩვენებს, რომ რესპირატორული ვირუსების გავრცელების თვალსაზრისით პირველ ადგილზე რინოვირუსებია", — გვითხრა ჩხაიძემ — "ეს არის სასუნთქი სისტემის დაავადება, რომელიც შემოდგომა-ზამთარში განსაკუთრებით აქტიურდება."
  
• მეორე ადგილზე, სიხშირის მიხედვით, "ძველი კორონავირუსია".

ექიმი შეგვახსენებს, რომ მართალია, კორონავირუსის შემთხვევებმა იკლო, მაგრამ არსად გამქრალა და სავარაუდოდ, არც გაქრება: "ის მუდმივად დარჩება იმ ვირუსული პეიზაჟის ნაწილად, რაც განაპირობებს ავადობას, განსაკუთრებით, ზამთრის თვეებში".

შეგვიძლია გრიპზე ვაქცინაცია მომდევნო თვეებში, თუ ამას ახლა ვერ ვახერხებთ?

• სპეციალისტის განმარტებით, მართალია, აცრისთვის საუკეთესო პერიოდი ოქტომბრის ბოლოა, თუმცა გრიპის საწინააღმდეგო ვაქცინა ნებისმიერ დროს ეფექტიანია.