აშშ-ს პრეზიდენტი დონალდ ტრამპი საგარეო ვიზიტით პოლონეთს ეწვია, სადაც მან შეხვედრა გამართა პოლონეთის პრეზიდენტთან ანდჟეი დუდასთან.

ტრამპმა პოლონეთში არაერთ მნიშვნელოვან საკითხთან დაკავშირებით, მათ შორის, აშშ-ს საპრეზიდენტო არჩევნებში რუსეთში შესაძლო ჩარევაზე ისაუბრა: "მე ვფიქრობ, ეს შეიძლება ყოფილიყო რუსეთიც, ასევე ვვარაუდობ, რომ შესაძლოა, ყოფილიყო სხვა ქვეყნებიც, არ დავკონკრეტდები, თუმცა ვთვლი, რომ ჩვენს საპრეზიდენტო არჩევნებში სხვა ქვეყნებიც ერეოდნენ".

ტრამპის თქმით, აშშ და პოლონეთი თანამშრომლობენ რუსეთის დესტაბილიზაციურ ქმედებებთან საბრძოლველად და ამერიკა მხარს უჭერს მშვიდობას ცენტრალურ და აღმოსავლეთ ევროპაში. ტრამპი ასევე შეეხო ჩრდილო კორეის საკითხს და განაცხადა, რომ ჩრდილოეთ კორეის ქცევა დიდი საფრთხეების შემცველია და პრობლემა გადაწყვეტას საჭიროებს. პრესკონფერენციაზე საუბარი შეეხო ნატოს საკითხს. ტრამპის თქმით, პოლონეთი ჩრდილო-ატლანტიკური გაერთიანების ის ერთ-ერთი იშვიათი წევრია, რომელიც ნაკისრ ფინანსურ ვალდებულებას პატიოსნად ასრულებს.

პოლონეთის შემდეგ ტრამპი გერმანიაში გაემგზავრება, სადაც იგი მონაწილეობას მიიღებს G20-ის სამიტში, სწორედ ამ სამიტის ფარგლებში შედგება პირველი შეხვედრა დონალდ ტრამპსა და ვლადიმერ პუტინს შორის.