გერმანიის მუზეუმის თანამშრომელმა ნახატი ყალბი ასლით ჩაანაცვლა, ორიგინალი ნამუშევარი გაყიდა და ძვირადღირებული ნივთები შეიძინა, მათ შორის, როლს-როისი და არაერთი ცნობილი ბრენდის მაჯის საათი. 30 წლის კაცი ქურდობისთვის უკვე გაასამართლეს და როგორც აღმოჩნდა, აქამდე მას კიდევ 3 სხვა ორიგინალი ნახატიც მოუპარავს. დამნაშავეს თავისუფლების აღკვეთის ნაცვლად 21-თვიანი პირობითი მსჯავრი განესაზღვრა და მუზეუმისთვის 64 ათას დოლარზე მეტის გადახდა დაეკისრა.

მიუნხენის რაიონული სასამართლოს განცხადებაში ნათქვამია, რომ 30 წლის კაცმა დანაშაული აღიარა და დასძინა, რომ დაუფიქრებლად მოქმედებდა და დღეს საკუთარი საქციელის ახსნა არც კი შეუძლია. დაკავებული 2016-2018 წლებში მიუნხენის მუზეუმის კოლექციების მენეჯმენტის განყოფილებაში მუშაობდა. მან მოიპარა ნახატი, სახელად ბაყაყი პრინცის ამბავი, შემდეგ კი აუქციონზე 52 ათას დოლარად გაყიდა.

ფოტო: Getty Images

30 წლის კაცმა სამი ნახატი სხვა მუზეუმის საცავიდანაც მოიპარა. ორი მათგანი მოლაპარაკების გზით, ერთი კი ისევ აუქციონზე გაყიდა. როგორც დაკავებულმა აღიარა, ფული ვალების დასაფარად და ფუფუნებაში ცხოვრებისთვის სჭირდებოდა. სასამართლოს განცხადებით, კაცი წლების განმავლობაში ბოროტად იყენებდა საცავებში შესვლის უფლებას, რათა ძვირფასი ნივთები შეერჩია, შემდეგ კი მოეპარა.

მიუნხენის მუზეუმის განცხადებით, მოპარული ნახატების დაბრუნებაზე მუშაობა უკვე დაიწყეს. რაც შეეხება დამნაშავეს, მუზეუმის განცხადებით, ყველა თანამშრომელს სათანადოდ ამოწმებდნენ და სამსახურის დაწყების მომენტში 30 წლის კაცს კრიმინალური წარსული არ ჰქონდა.