ლეგენდარული იტალიელი მსახიობი, 50-იანი წლების სექს სიმბოლო, ჯინა ლოლობრიჯიდა, რომელმაც ახლახან 90 წლის იუბილე იზეიმა, ახალ ინტერვიუში მისი და სოფია ლორენის დაპირისპირებაზე გავრცელებულ ხმებს პასუხობს.

"შუღლი არავისთან მჭირდება, მე ყოველთვის ნომერ პირველი ვიყავი. ზოგიერთებისგან განსხვავებით ყველაფერს ჩემით მივაღწიე, არასდროს დამხმარებია ჩემი პროდიუსერი, ყველაფერს მარტო ვაკეთებდი", ამბობს ლოლობრიჯიდა და ამით ხაზს უსვამს იმას, რომ სოფია ლორენს მისი მეუღლე და ამავდროულად მისი პროდიუსერი კარლო პონტი დაეხმარა წარმატების მიღწევაში.

ჯინასა და სოფიას დაპირისპირების შესახებ პრესა მთელი 50 წლის განმავლობაში საუბრობდა. ხშირად ადარებდნენ ერთმანეთს და მხარდაჭერას ძირითადად ლორენის მიმართ გამოხატავდნენ. მათი შუღლის შესახებ საუბრები რამდენიმე წლის წინ, სოფია ლორენისთვის ჰოლივუდის დიდების ხეივანში ვარსკვლავის გახსნამ განაახლა, როგორც ტაბლოიდები წერდნენ ამ ამბავმა ლოლობრიჯიდა გააღიზიანა და სწორედ ამის დამსახურებაა ის, რომ მრავალწლიანი მოლაპარაკებების შედეგად, მას საკუთარ ვარსკვლავს გაუხსნეს.

ამავე ინტერვიუში ჯინა ლოლობრიჯიდა საკუთარ ასაკზეც ხუმრობს და ამბობს, რომ 90 წელი საერთოდ არაფერია.

"მხოლოდ 90 წლის ვარ, ეს არაფერია, უბრალოდ 30-ს უნდა დავუმატოთ 30 და კიდევ 30. იმის გაცნობიერება, რომ უკვე ხანდაზმული ვიყავი მხოლოდ მაშინ დავიწყე, როცა გარკვეული სირთულეების წინაშე დავდექი", ამბობს ლეგენდარული მსახიობი.