დღეს, დილის დაახლოებით 6 საათზე Wizz Air-მა ქუთაისი-ბერლინის რეისი ვერ შეასრულა, მგზავრებმა არ იციან როდის გაფრინდებიან. მათ წყალტუბოში სასტუმროში გაჩერებას სთავაზობენ.

ქუთაისიდან მიმავალ მგზავრებს პარასკევის რეისით გაფრენას სთავაზობენ. თუმცა, Wizz Air-ის ვებგვერდის მონაცემებით, ამ რეისზე მხოლოდ ორი ბილეთია დარჩენილი, რომელთა ღირებულებაც 1 081 ლარია.

რეისის შეუსრულებლობის გამო საქართველოში ვერ ჩამოვიდნენ ბერლინიდან ქუთაისში მომავალი მგზავრებიც. როგორც On.ge-ს ბერლინიდან მომავალი ერთ-ერთი მგზავრი ეუბნება, მათ ფრენის გადადების ან გაუქმების მიზეზებს არ უხსნიან. იმავე მგზავრის ინფორმაციით, მას ბერლინიდან ალტერნატიული საშუალებით გამოგზავრებას სთავაზობენ, თუმცა, ხარჯების ანაზღაურება მას მოუწევს.

მიზეზების გადამოწმებისთვის On.ge საქართველოს აეროპორტების გაერთიანებას დაუკავშირდა. იქ მიზეზების გარკვევას დაგვპირდნენ, თუმცა, ამ ეტაპზე ტელეფონი გათიშული აქვთ. ქუთაისის აეროპორტი ფეისბუკის ოფიციალურ გვერდზე წერს, რომ მემინგენი - ქუთაისის რეისი უამინდობის გამო აეროპორტში ვერ დაჯდა, რის გამოც ვერც ბერლინში გაფრინდა თვითმფრინავი. ამავე პოსტის მიხედვით, ისინი Wizz Air-ის პასუხს ელოდებიან როგორ გადაწყდება ამ მგზავრების ბედი.

ამ საკითხზე On.ge-მ ვიზეართან დაკავშირება ვერ შეძლო.