სამშაბათს, 4 ივლისს, ჩრდილოეთ კორეამ დიდი დისტანციის რაკეტა პირველად გამოსცადა წარმატებით და აცხადებს, რომ მას მსოფლიოს ნებისმიერ წერტილში შეუძლია მიღწევა. ინფორმაციას CNN ავრცელებს.

რაკეტის გამოცდა კიმ ჩენ ინის ბრძანების საფუძველზე ჩატარდა. ჩრდილოეთ კორეის ცენტრალური ტელევიზიის ინფორმაციით, რაკეტამ 2,8 ათასი კილომეტრის მანძილი დაფარა.

ესაა ყველაზე მაღალი წერტილი, რომლისთვისაც ჩრდილოეთ კორეის რაკეტას მიუღწევია. გამოცდის შედეგი ამერიკას შესაძლო თავდასხმის საფრთხის ქვეშ აყენებს.

როგორც ჩანს, ჩრდილოეთ კორეამ მაქსიმალური პოლიტიკური ეფექტის მისაღწევად, რაკეტის გამოცდა 4 ივლისს დაამთხვია, როდესაც ამერიკა ინგლისისგან დამოუკიდებლობის მოპოვების დღეს ზეიმობს და ქვეყანაში არდადეგებია გამოცხადებული. ამასთან, გუშინ, 3 ივლისს, ამერიკის პრეზიდენტი დონალდ ტრამპი იაპონიისა და ჩინეთის ლიდერებს ესაუბრა ჩრდილოეთ კორეიდან მომდინარე საფრთხეებზე. ამ საკითხის განხილვა იგეგმებოდა დიდი ოცეულის შეხვედრაზეც, რომელიც 7 ივლისს, ჰამბურგში გაიმართება და მასზე პუტინი და ტრამპი, პრეზიდენტების რანგში, პირველად შეხვდებიან ერთმანეთს.

ანალიტიკოსების თქმით, მოახლოებულია იმის საშიშროებაც, რომ ჩრდილოეთ კორეაში შესაძლოა ერთ დღეს ტექნოლოგია ისე განვითარდეს, რომ მან მინიატურული ატომური ბომბი შექმნას.

ანალიტიკოსები შიშობენ, რომ შესაძლოა ერთ დღესაც ჩრდილოეთ კორეამ ისე განავითაროს ტექნოლოგია, რომ შორი დისტანციის რაკეტაზე შეძლოს ბირთვული ქობინის მიმაგრება. ანალიტიკოსთა ნაწილის მოსაზრებით, ეს ტენოლოგია ჩრდილოეთ კორეას უკვე აქვს.

ჩინეთი და რუსეთი უკვე გამოეხმაურა ჩრდილოეთ კორეის მიერ ჩატარებულ ტესტს და მას მიუღებელი უწოდეს.

რამდენად დამაჯერებელია ჩრდილოეთ კორეის ეს განცხადება?

სიდნეის Lowe-ის ინსტიტუტში საერთაშორისო უსაფრთხოების პროგრამის დირექტორი, იუენ გრემი აცხადებს, რომ რაკეტის ერთი წარმატებული გამოცდა არ ნიშნავს იმას, რომ ჩრდილოეთ კორეას მართლა შეუძლია მსოფლიოს ნებისმიერ წერტილში მიღწევა:

"ერთი წარმატებული ტესტი არ ნიშნავს იმას, რომ ყველა ბარიერს გადალახავ. მათი განცხადება მათ რეალურ შესაძლებლობებს არ ემთხვევა".

თუმცა, ფაქტია, რომ ჩრდილოეთ კორეის მიერ ეს ამ დისტანციაზე რაკეტის პირველი გამოცდაა. მიმდინარე წელს ჩრდილოეთ კორეამ უკვე 11 რაკეტა გამოსცადა.