რატომ არის მნიშვნელოვანი: რუსეთის უშიშროების საბჭოს თავმჯდომარის მოადგილემ მორიგი არაადეკვატური იდეების გავრცელება დაიწყო.

• ამჯერად მედვედევი იმუქრება, რომ, "თუ საფუძვლიანი მიზეზი იარსებებს", შესაძლოა, საქართველოს ოკუპირებული ტერიტორიები მიიერთონ.
• სხვა რუსი პროპაგანდისტების მსგავსად, ისევ ირწმუნება, რომ საქართველოში შეკვეთილი "რუსოფობიური აფეთქებები" დაიწყო.

დეტალები: მედვედევის მტკიცებით, საქართველო, რომლის ტერიტორიებიც რუსეთის მიერაა ოკუპირებული, თავად ცდილობს საზღვრებთან დაძაბულობის კერების შექმნას.

• გარდა ამისა, ოკუპანტი ქვეყნის უშიშროების საბჭოს მდივანს საქართველოს ნატოში გაწევრიანების პერსპექტივაც აღიზიანებს.
• "2008 წელს შევაჩერეთ თბილისზე თავდასხმა, როდესაც მოვახერხეთ წარმოშობილი საფრთხეების აღმოფხვრა და უსაფრთხოების გარანტია მივიღეთ. მაგრამ ახლა ვითარება კვლავ აქტიურად იძაბება", — ამბობს მედვედევი, რომელიც რუსეთის პრეზიდენტი იყო მაშინ, როცა აგრესორმა ქვეყანამ საქართველოში ომი დაიწყო.
• "როგორც ჩანს, სურთ, რომ უკრაინის ფლანგთან ერთად ჩვენს საზღვრებთან დაძაბულობის კიდევ ერთი კერა შეიქმნას. ისევ მიდის საუბარი ნატოში საქართველოს შესაძლო გაწევრიანებაზე", — თქვა მან.
• მედვედევი ირწმუნება, რომ 2008 წლის ისტორიის გამეორება არ სჭირდებათ და მზად არიან პრობლემებს მოლაპარაკების მაგიდასთან, გაეროს წესდების "სულისკვეთებით" გაუმკლავდნენ.
• "მაგრამ თუ ჩვენს შეშფოთებას რეალური საფრთხე დაემუქრება, ჩვენ არ მოგვერიდება. აფხაზეთსა და სამხრეთ ოსეთში რუსეთთან შეერთების იდეა კვლავ პოპულარულია. ის შეიძლება, განხორციელდეს, თუ ამის საფუძვლიანი მიზეზი იარსებებს", — განაცხადა მედვედევმა.

კონტექსტი: გასული წლის მაისში ოკუპირებული ცხინვალის დე ფაქტო პრეზიდენტმა, ანატოლი ბიბილოვმა ოკუპირებული ცხინვალის რუსეთთან შეერთების რეფერენდუმი დანიშნა.

• 18 მაისს კრემლის სპიკერმა, დმიტრი პესკოვმა განაცხადა, რომ ოკუპირებულ ცხინვალში "რეფერენდუმი" რუსეთთან ადგილზე არსებულ განწყობებს ასახავს, თუმცა მოსკოვი ამჟამად ამ თემაზე არ მუშაობდა.
• კითხვაზე, მიაჩნდა, თუ არა არსებულ ვითარებაში ამგვარი "რეფერენდუმის" ჩატარება მიზანშეწონილად, პესკოვმა უპასუხა, რომ ეს ხალხისა და დე ფაქტო ხელისუფლების გადასაწყვეტია და ორიენტირება მათი ხედვით უნდა მომხდარიყო.
• 31 მაისს ახალმა დე ფაქტო პრეზიდენტმა, ალან გაგლოევმა "რეფერენდუმი" შეაჩერა.
• გაგლოევის ბრძანებაში მიზეზად ნახსენები იყო "რეფერენდუმზე" წარმოდგენილი საკითხების სამართლებრივი შედეგების გაურკვევლობა.
• ასევე, აღნიშნული იყო, რომ დაუშვებელია "რეფერენდუმი" საკითხების ცალმხრივი გადაწყვეტა, რომელიც რუსეთის კანონიერ უფლებებსა და ინტერესებსაც ეხება.
• ამავდროულად, გაგლოევი აცხადებდა, რომ სრულად უჭერდა მხარს დე ფაქტო რესპუბლიკის რუსეთთან გაერთიანების შესახებ სურვილს.

ქართული მხარე აცხადებდა, რომ ოკუპირებული ცხინვალის არც დე ფაქტო ხელისუფლებას, არც არჩევნებს და რეფერენდუმს არ აღიარებს.

• "ჩვენ გვაქვს ჩვენი მკაფიო პოლიტიკა. [...] ამასთან დაკავშირებით ჩვენი პოზიცია არის ძალიან ნათელი, მკაფიო, აქედან გამომდინარე, ბუნებრივია, გავყვებით ზუსტად იმავე ხაზს" — ამბობდა კობახიძე.

• On.ge-სთან საუბარში რუსეთთან ურთიერთობის საკითხებში პრემიერმინისტრის სპეციალურმა წარმომადგენელმა, ზურაბ აბაშიძემ განაცხადა, რომ მოსკოვში ესმით და საქმის კურსში არიან ამ საკითხზე ქართული მხარის უარყოფითი დამოკიდებულების შესახებ და ამას ყურადღებას უთმობენ.

• [კარასინმა] თქვა, რომ მოსკოვი ამ "რეფერენდუმთან" დაკავშირებით არანაირ აქტივობაში არ არის ჩართული. დაახლოებით, ასეთივე კომენტარი მოვისმინეთ ჩვენ რამდენიმე დღის წინ დმიტრი პესკოვისგან", — ამბობდა აბაშიძე.