რა ხდება: 3 აგვისტოს რაჭაში, შოვში მეწყერი ჩამოწვა, რასაც მსხვერპლი მოჰყვა.

  • ოფიციალური მონაცემებით, მაშველებმა 15 ცხედარი იპოვეს — დაზიანებების გამო დაღუპულთა ნაწილის ამოცნობა ამ დრომდე ვერ ხერხდება.
  • მაშველები, ჯარისკაცები და ადგილობრივები 21 ადამიანს ეძებენ, რომლებთანაც კონტაქტი ვერ მყარდება.

დეტალები: გუშინ გავრცელდა ინფორმაცია, რომ შოვში ოჯახის 5 წევრს ეძებდნენ — ალინა პოლიკოვსკას, მის ქმარს ზაზა მესხს და 3 შვილს.

  • გუშინვე სააგენტოებზე გამოქვეყნდა არაერთი დაუდასტურებელი ინფორმაცია მათი პოვნის შესახებ, თუმცა ოფიციალურ უწყებებს არ დაუდასტურებიათ.
  • დღეს ზაზა მესხის ყოფილმა ცოლმა ფეისბუქზე დაწერა, რომ ნაპოვნ ცხედრებს შორის ალინა პოლიკოვსკა ამოიცნეს.
  • მისივე თქმით, ჯერ კიდევ ეძებდნენ ზაზასა და 3 ბავშვს, რომელთაგან 2 მისი შვილია, 1 კი — ალინას.
  • ალინას დაღუპვაზე წერდნენ ოჯახის ახლობლები და მეგობრებიც.
  • უკრაინული მედიის, ევროპეისკა პრავდას ინფორმაციით, საგარეო საქმეთა სამინისტროში დაუდასტურეს უკრაინის მოქალაქის, ალინას დაღუპვა.
  • მათივე განცხადებით, უკრაინის საელჩო ახლობლებთან კავშირზეა და თანამშრომლობს საქართველოს ხელისუფლებასთან ცხედრის გადასვენების საკითხზე.
  • "პარალელურად ვამოწმებთ, ხომ არ იყვნენ სხვა უკრაინელებიც შოვში", — განაცხადა უწყების პრესსპიკერმა, ოლეგ ნიკოლენკომ.