მეწყერი რაჭაში, შოვში დღეს ჩამოწვა. მედიები ადგილიდან კადრებს ავრცელებენ, სადაც იქ არსებული ვითარებაა ასახული.

  • თავდაპირველად, მთის ამბებმა გაავრცელა ინფორმაცია რომ მეწყერში 16 ადამიანია მოყოლილი და მათ გადაუდებელი დახმარება სჭირდებათ.
  • დაწერეს, რომ მათგან რამდენიმე ბავშვია.

რა ვიცით იქ მყოფებზე: მთავარ არხთან სატელეფონო საუბარში მოქალაქე ამბობს, რომ სამაშველო ვერტმფრენს ელოდებიან და სასწრაფო დახმარებას საჭიროებენ.

  • მათივე თქმით, არანაირი გასასვლელი არ არის, ადგილზე კი ბავშვები და მოხუცებით არიან.
  • როგორც მოქალაქე მედიასთან ამბობს, ისინი სასტუმრო სანსეტის მიმდებარედ იმყოფებიან.
  • On.ge-ს საგანგებო სიტუაციების მართვის სამსახურში განუცხადეს, რომ მეწყერის შედეგად ჩამოიშალა მიწის მასა, თუმცა მათთან დაშავებულებზე ინფორმაცია არ შესულა.
  • დაშავებულებზე არ უსაუბრია არც რაჭის გუბერნატორს, პაპუნა მარგველიძეს. საზოგადოებრივ მაუწყებელთან მან მხოლოდ ის თქვა, რომ ადგილზე სამაშველო ჯგუფები მუშაობენ.

დეტალები: ცოტა ხნის წინ შინაგან საქმეთა სამინისტროში განაცხადეს, რომ მომხდარის შესახებ ინფორმირებულია ყველა შესაბამისი უწყება და ადგილზე მობილიზებულია ტექნიკა.

  • ასევე, ამბობენ, რომ სასაზღვრო პოლიციის ვერტმფრენით მიდიან საგანგებო სიტუაციების მართვის სამსახურის მაშველები და სხვა საპოლიციო დანაყოფები.
  • "ამ ეტაპზე, დაშავებულებზე დაზუსტებული ინფორმაცია არ არის. დამატებით ინფორმაციას ეტაპობრივად მოგაწვდით", — ვკითხულობთ განცხადებაში.