ამის შესახებ განცხადება ომბუდსმენმა გაავრცელა.

რა მოხდა: 31 ივლისს, ბათუმში, აქციაზე, სადაც რუსი პროპაგანდისტებით დატვირთული გემის ჩამოდგომას აპროტესტებდნენ, 23 ადამიანი დააკავეს.

  • ათეულობით სამართალდამცავი რუსეთის მოქალაქეებს როგორც გემს გარეთ, ასევე, შიგნითაც იცავდა.
  • მაგალითად, ჩვენს კადრებში ჩანს, რომ რუსულ გემზე რამდენიმე ქართველი პოლიციელი იყო ასული.
  • შემდეგ კი ოკუპანტი ქვეყნიდან ჩამოსულებისთვის კორიდორი გააკეთეს, წინასწარ მომზადებულ ავტობუსსა და მიკროავტობუსში ააცილეს და ასე გაარიდეს ტერიტორიას.
  • "ნაგავი ვესროლე რუსების მანქანას", — ასე პასუხობს აქციის ერთ-ერთი მონაწილე კითხვას, რატომ დააკავეს.
  • ლელოს წევრმა, ირაკლი კუპრაძემ ფეისბუქგვერდზე ვიდეოს გაავრცელა და დაწერა, რომ ასევე, დააკავეს უკრაინის მოქალაქე, რომელსაც წაართვეს ტელეფონი, პირადი ნივთები და არ აძლევდნენ დარეკვის შესაძლებლობას.

ომბუდსმენის განცხადებით, სახალხო დამცველის რწმუნებული საპროტესტო აქციაზე დაკავებულ სამ მოქალაქეს შეხვდა.

  • აპარატში ამბობენ, რომ ერთ-ერთმა დაკავებულმა პოლიციელის მხრიდან სიტყვიერ და ფიზიკურ შეურაცხყოფაზე ისაუბრა.
  • "დაკავებულის მიმართ განხორციელებული სავარაუდო არასათანადო მოპყრობის შესახებ სახალხო დამცველის აპარატმა დაუყოვნებლივ აცნობა სპეციალურ საგამოძიებო სამსახურს და სწრაფ და ეფექტიან რეაგირებას ელოდება", — ნათქვამია განცხადებაში.
  • აჭარის პოლიციის დეპარტამენტის მიერ სახალხო დამცველის რწმუნებულისთვის მიწოდებული ინფორმაციის თანახმად, საპროტესტო აქციაზე დაკავებული ცხრა მოქალაქე გადაყვანილია სენაკისა და ზუგდიდის დროებითი მოთავსების იზოლატორებში, ხოლო ორი დაკავებულის გადაყვანა ოზურგეთის დროებითი მოთავსების იზოლატორში იგეგმება.