ინფორმაციას სპეციალური საგამოძიებო სამსახური ავრცელებს.

დეტალები: უწყების ინფორმაციით, დანაშაულში ამხილეს შსს-ს სასაზღვრო პოლიციის სახმელეთო საზღვრის დაცვის დეპარტამენტის თანამშრომელი, რომელმაც 2023 წლის 11 მაისს თბილისში, შურისძიების მოტივით, ფიზიკური შეურაცხყოფა მიაყენა მოქალაქეს.

  • კერძოდ, იარაღი ჩაარტყა, ასევე, ძირს დაგდებულ მსხვერპლს დაემუქრა სიცოცხლის მოსპობით და კვლავ განაგრძო მისი ფიზიკური შეურაცხყოფა.
  • საგამოძიებოს ინფორმაციით, მსხვერპლს შედეგად თავის მიდამოში სხეულის მსუბუქი დაზიანებები მიადგა.
  • შსს-ს თანამშრომელს პროკურატურამ ბრალი ჯანმრთელობის განზრახ ნაკლებად მძიმე დაზიანებისთვის და მუქარისთვის წარუდგინა.
  • ამას გარდა, დანაშაულში მხილებული და დაკავებულია დაცვის პოლიციის დეპარტამენტის თანამშრომელი, რომელიც ყოფილ ცოლს გენდერის ნიშნით, შეუწყნარებლობის მოტივით სისტემატურად ატენებდა შეურაცხყოფას და ამცირებდა.
  • საგამოძიებოს განცხადებით, ის 2023 წელს ყოფილ ცოლს სიცოცხლის მოსპობით დაემუქრა.
  • პროკურატურამ სამართალდამცავს ბრალი ოჯახში ძალადობისა და მუქარისთვის წარუდგინა.

გარდა ამისა, შსს-ს კიდევ ერთმა თანამშრომელმა 2023 წლის 4 აპრილს თბილისში ფიზიკური შეურაცხყოფა მიაყენა მოქალაქეს, შედეგად მან სხეულზე სხვადასხვა სახის დაზიანებები მიიღო.

  • პოლიციელს ბრალი ჯანმრთელობის განზრახ მსუბუქი დაზიანებისთვის წარუდგინეს.
  • დანაშაულში, ასევე, მხილებულია სამართალდამცავი, რომელმაც, საგამოძიებოს განცხადებით, 2023 წლის 16 მარტს თბილისში მოქალაქე სცემა და სხეულის ნაკლებად მძიმე დაზიანება მიაყენა.
  • გარდა ამისა, ის, ასევე, 2023 წლის 17 მაისს ნაცნობ ქალს სიცოცხლის მოსპობით დაემუქრა და დააზიანა მისი მანქანა.
  • მას ბრალი ჯანმრთელობის განზრახ ნაკლებად მძიმე დაზიანებისთვის, მუქარისა და ნივთის დაზიანებისთვის წარედგინა.