რა მოხდა: ალტინფოს დაორგანიზებული ჰომოფობიური, ძალადობრივი და პრორუსული ჯგუფები სასულიერო პირებთან ერთად დღეს ვაჟა ფშაველას ძეგლთან შეიკრიბნენ და მსვლელობით თბილისი პრაიდის საფესტივალო ტერიტორიაზე ავიდნენ.

  • ისინი დაუფარავად აჟღერებდნენ დანაშაულებრივ მოწოდებებს და ამბობდნენ, რომ დახურულ ტერიტორიაზე დაგეგმილი ღონისძიების ჩაშლას აპირებდნენ.
  • გზაშიც და საფესტივალო ტერიტორიასთანაც მობილიზებული იყო პოლიცია, თუმცა ძალადობრივი ჯგუფები ლისის ტბამდე დაუბრკოლებლად ავიდნენ.
  • ამის შემდეგ მათ არაერთხელ გაარღვიეს პოლიციის კორდონი — მედიების კადრებში ჩანს, რომ რამდენიმე მათგანი ტერიტორიიდან გაარიდეს, ამ დრომდე უცნობია დააკავეს თუ არა ვინმე.
  • ადგილზე სპეცრაზმიც გამოჩნდა, თუმცა ამის მიუხედავად მოძალადეები წინ მიიწევდნენ და საბოლოოდ, საფესტივალო ტერიტორიამდე მივიდნენ.

თბილისი პრაიდის გუნდს ტერიტორიის დატოვება მოუწია. მათი განცხადებით, სამართალდამცავებმა ვერ შეძლეს ტერიტორიის დაცვა და სამარშრუტო ტაქსებით ევაკუაცია განხორციელდა.

  • ორგანიზატორები მოუწოდებენ ფესტივალის სტუმრებს, რომ აღარ ავიდნენ ტერიტორიაზე, რადგან იქ ყოფნა უსაფრთხო არ არის.
  • ადგილზე რჩებიან სხვადასხვა მედიის წარმომადგენლები — როგორც ისინი ამბობენ, პოლიცია ცდილობს მათი უსაფრთხოების დაცვას და მუშაობის პროცესში მათთან ერთად გადაადგილდება.

დეპუტატი სამხარაძე ამ ფაქტით კმაყოფილია და ჰომოფობიურ პოსტში ირონიულად წერს, რომ ღონისძიება გაუქმდა. არადა, სწორედ მისი გუნდი და შსს დებდა ღონისძიების დაცვის პირობას.

  • პრორუსი ჰომოფობების მიერ კორდონის გარღვევას, პოლიციასთან დაპირისპირებას და ფესტივალის ასე ჩაშლას ის "საქართველოს მოსახლეობის დამსახურებას" უწოდებს.
  • "ორი დღეა ვამტკიცებ, რომ ხალხმა უნდა მიიღოს გადაწყვეტილება, რა გვინდა, ვისთან გვინდა და სად ვხედავთ ჩვენს სამშობლოს", — წერს დეპუტატი, რომელიც ხშირად აყენებს შეურაცხყოფას მოქალაქეებს, აქტივისტებს და ოპოზიციის წარმომადგენლებს, ცნობილია აგრესიით, თავდასხმებითა და გინებით.