იტალიის პოლიციამ დაადგინა იმ ბრიტანელი ტურისტის ვინაობა, რომელმაც კოლოსეუმის კედელი დააზიანა. 27 წლის ფიტნეს ინსტრუქტორმა ივან დიმიტროვმა, რომელსაც ანტიკური ძეგლის დაზიანება ედება ბრალად, რომის მერს მოსაბოდიშებელი წერილი უკვე მისწერა. დიმიტროვის თქმით, მხოლოდ "ახლაღა გაიაზრა, რამდენად ძველი ყოფილა" კოლოსეუმის ნაგებობა.

ვანდალიზმის ფაქტის ამსახველი ვიდეომასალა რამდენიმე დღის წინ გავრცელდა იუთუბზე. მასში ჩანდა, რომ ტურისტმა იტალიის სიმბოლოდ ქცეული ღირსშესანიშნაობის კედელზე თავისი და თავისი შეყვარებულის სახელები ამოკაწრა. სწორედ ამიტომ, იტალიის პოლიციას დამნაშავის პოვნა არ გასჭირვებია.

გავრცელებულ წერილში, დიმიტროვმა "იტალიელებსა და მთელ მსოფლიოს" მოუბოდიშა კაცობრიობის მემკვიდრეობის დაზიანებისთვის. ამის მიუხედავად, ტურისტის წინააღმდეგ უკვე აღიძრა საქმე. ბრალის დამტკიცების შემთხვევაში, დიმიტროვს 2 500 ევროდან 15 ათას ევრომდე ჯარიმა და თავისუფლების ორიდან ხუთ წლამდე აღკვეთა ემუქრება. თუმცა, საქმე არაა აღძრული დიმიტროვის პარტნიორის წინააღმდეგ, რომელიც მომხდარის შემსწრე იყო.

"ეს ბიჭი განასახიერებს იმ უცხოელს, რომელსაც დაუფიქრებლად სჯერა, რომ იტალიაში ყველაფერი ნებადართულია — მათ შორის ისეთი ქმედება, რომელსაც მათ ქვეყანაში მკაცრი სასჯელი მოჰყვებოდა", — ამბობს ტურისტის ადვოკატი.

ორიათასწლოვანი კოლოსეუმის დაზიანების ფაქტები კი, სამწუხაროდ, მართლაც არ წარმოადგენს იშვიათობას. ამ წელს ეს, სულ მცირე, მეოთხე მსგავსი შემთხვევაა.