ევროპის 21-წლამდელთა ჩემპიონატი, რომელსაც საქართველო და რუმინეთი მასპინძლობენ, დაიწყო. საქართველოს აზალგაზრდულმა ნაკრებმა პირველი მატჩი ტურნირის ერთ-ერთ ფავორიტად მოაზრებულ პორტუგალიასთან დინამო არენაზე ჩაატარა.

ფოტო: nakrebi.ge



პორტუგალიელები თავდაპირველად ტერიტორიულ უპირატესობას ფლობდნენ და ნელ-ნელა სათამაშოშიც გადაზარდეს. თუმცა საქართველო ტაიმის მიწურულს გააქტიურდა და ერთბაშად ორი გოლის გატანა შეძლო. 37-ე წუთზე გოლი გიორგი გაგუამ გაიტანა, ხოლო პირველი ტაიმის ბოლო წუთზე თავი საბა საზონოვმა გამოიჩინა. ორივე ეპიზოდში საგოლე პასი გიორგი წიტაიშვილმა მიითვალა.

მეორე ტაიმი პორტუგალიელებმა ძალიან აგრესიულად დაიწყეს და რამდენიმე მომენტიც ჰქონდათ, მაგრამ რამაზ სვანაძის ნაკრებმა შტურმს გაუძლო. მოგვიანებით კი საქართველოს ნაკრებმა მეტოქე კონტრშეტევაზე დაიჭირა და სახიფათო შეტევის ჩაშლისთვის პორტუგალიას ტომაშ არაუჟო გაუძევეს, რომელიც გოჩოლეიშვილს ეუხეშა. სტუმრებს ამის შემდეგ ფაქტობრივარად აღარაფერი გამოუვიდათ და საქართველომ სავსებით დამსახურებულად იმარჯვა.

ფოტო: ნაკრები

ჩვენი ჯგუფის მეორე მატჩი პარალელურად განახლებულ მიხეილ მესხზე ჩატარდა ბელგიასა და ნიდერლანდებს შორის და 0:0 დასრულდა. შეგახსენებთ, რომ ჯგუფიდან ორი საუკეთესო ნაკრები გადის და საქართველომ ამისკენ დიდი ნაბიჯი გადადგა. საქართველოს ნაკრებს შემდეგი მატჩები 24 ივნისს ბელგიასთან და 27 ივნისს ნიდერლანდებთან ელის, ორივე მატჩი ჩვენი დროით 20:00 საათზე დაიწყება და დინამო არენაზე გაიმართება.


საქართველოს ბანკი ქართული ფეხბურთის და ევროპის ახალგაზრდული ჩემპიონატის მხარდამჭერია.