თბილისის მიკროავტობუსების მძღოლებს ჯერ კონდიცირების სისტემის ჩართვის ბრძანება არ მიუღიათ, თუმცა თბილისის მიკროავტობუსში ამბობენ, რომ მითითება ავტოფარეხების ხელმძღვანელების დონეზე გავრცელებულია.

თბილისის მიკროავტობუსის პრესსამსახურის უფროსი, ნათია მიქიაშვილი On.ge-სთან ადასტურებს, რომ პირველი ივლისიდან მძღოლები ვალდებულები იქნებიან კონდიციონერი ჩართონ:

"სულ ორიოდე დღეა რაც დათბა, შესაბამისად, უკვე მძღოლებმა მიიღეს მითითება, რომ ტემპერატურის მატებასთან დაკავშირებით, მგზავრების მოთხოვნისთანავე ჩართონ კონდიცირების სისტემა. ოფიციალურ განცხადებას სულ რამდენიმე დღეში გავაკეთებთ, ხოლო ბრძანება, შინაგანაწესის თანახმად, უკვე პირველი ივლისიდან შევა ძალაში".

ნათია მიქიაშვილის თქმით, კონდიციონერის ჩართვის დროს მიკროავტობუსში ფანჯრის გაღება კონდიცირების სისტემას არ აზიანებს.

"თუმცა გამოდის, რომ კონდიციონერი ტყუილად არის ჩართული" - დასძენს ის.

მიქიაშვილის განცხადებით, მიკროავტობუსების მძღოლები ვალდებულები არიან, საკუთარი ხარჯებით, ყოველ ორ თვეში, ტრანსპორტს ქიმწმენდა ჩაუტარონ. მისი თქმით, ყველა მიკროავტობუსი დღის ბოლოს სუფთავდება.