რატომ არის მნიშვნელოვანი: დღეს, 29 მაისს, დაახლოებით, 1-საათიან შეხვედრაზე ევროკავშირის წევრი ქვეყნების ელჩებმა ეკონომიკის მინისტრს, ლევან დავითაშვილს რუსეთთან პირდაპირი ფრენების აღდგენის გამო დემარში გამოუცხადეს.

  • EU-ს ელჩმა, პაველ ჰერჩინსკმა შეხვედრის შემდეგ მედიასთან რუსეთ-საქართველოს შორის პირდაპირ ავიამიმოსვლის აღდგენაზე წუხილი გამოთქვა.
  • მისი განცხადებით, ფრენების აღდგენა საწინააღმდეგოა იმ გადაწყვეტილების, რომელიც ევროკავშირის წევრმა ქვეყნებმა რუსეთის იზოლაციაში მოქცევასთან დაკავშირებით მიიღეს.

დავითაშვილის თქმით, შეხვედრაზე ძალიან ღია და გულწრფელი დიალოგი შედგა, ძირითადი საკითხი ფრენების აღდგენა იყო, თუმცა ზოგადად, გეოპოლიტიკური ვითარებაც მიმოიხილეს.

  • როგორც ის ამბობს, "საქართველოს მდგომარეობა, საქართველოს სიტუაცია არ შეიძლება განხილული იყოს იმ კონტექსტში, როგორც სხვა ქვეყნების მდგომარეობა" და დაამატა, რომ ბევრი ელჩისთვის ეს "აბსოლუტურად გასაგები და ლოგიკურია".
  • "შეიძლება ჩვენ გვქონდეს აზრთასხვადასხვაობა გარკვეულ საკითხებზე, მაგრამ კიდევ ერთხელ ხაზს ვუსვამ, რომ ჩვენი მდგომარება არ შეიძლება გაიგივებული იყოს ევროკავშირის წევრი ქვეყნების მდგომარეობასთან. ჯერ ერთი, საქართველოა არ არის ევროკავშირის წევრი ჯერ კიდევ".
  • დავითაშვილი ამბობს იმასაც, რომ "პოზიტიური შეხვედრები" ბევრად ხშირი აქვთ".

გარდა ამისა, მინისტრის თქმით, ისაუბრეს სანქციების აღსრულებაზეც და ელჩებს მიეწოდათ ინფორმაცია იმაზეც, რომ საქართველოს რუსეთთან სამი ახალი დაკავშირების პუნქტი ექნება.

  • "დღეს იცით, რომ ძირითადად, საზღვარი გვაქვს ლარსით და აქ ხდება საბაჟო კონტროლი მკაცრად და ამას ყველა ხაზს უსვამს, რომ საქართველო არის სანდო, საიმედო პარტნიორის საერთაშორისო თანამეგობრობის სანქციების ასრულების ნაწილში. თუმცა ახალი 3 დაკავშირების პუნქტი გვიჩნდება ქუთაისის, თბილისისა და ბათუმის აეროპორტებში".
  • როგორც ის ამბობს, ამ საკითხზე ხელისუფლებას "მზა პოზიცია" აქვს, კერძოდ, დავითაშვილის თქმით, საბაჟო შესაძლებლობებს ზრდის" და ამატებს:
  • "როგორც უმაღლეს დონეზე ხდება სანქციების ასრულება ლარსის საბაჟო გამშვებ პუნქტზე, ასე იქნება დამატებითი საბაჟო კონტროლი ამ აეროპორტებშიც. ესეც ძალიან მნიშვნელოვანი ინფორმაციაა, რომელიც ევროკავშირის ელჩებს გავუზიარეთ".