ევროპული საქართველოს წევრი ზურაბ ჭიაბერაშვილი აფგან მუხთარლის საქმეზე ამბობს, რომ სტრასბურგში ამ საქმის წაღება დამატებით ზეწოლა იქნება საქართველოზე არა მარტო მის იმიჯზე, არამედ თვითონ მყოფ ხელისუფლებაზე. ევროპული საქართველოს წარმომადგენლის აზრით, სიმართლის გასარკვევად მნიშვნელოვანია საქართველოს პარლამენტში საგამოძიებო კომისია შეიქმნას:

"განათლების მინისტრი ჯეჯელავა, რაც უფრო მეტად გააგრძელებს ასეთ საკითხებზე ჩარევას და კომენტარს, მით უფრო მეტად გართულდება საქართველოს საკითხი ქვეყნის გარეთ, მით უფრო მეტად შეილახება მისი იმიჯი. სტრასბურგიც, ბუნებრივია ძალიან ბევრ შეკითხვას დასვამს საქართველოს ხელისუფლების მიმართ, თუ რამ გამოიწვია ესეთი გაუგონარი დანაშაული საქართველოს ტერიტორიაზე და ამიტომ ვამბობთ, რომ ევროპული საქართველოს აზრით, თუ რაიმემ შეიძლება მდგომარეობას მოფინოს ნათელი, ეს იქნება პარლამენტის საგამოძიებო კომისია".

რამდენიმე დღის წინ, რაიონულმა სასამართლომ აფგან მუხტარლის შინაპატიმრობაზე უარი უთხრა.

ბრალდების მხარის წარმომადგენელმა, ჰასან ნაგიევმა განაცხადა, რომ თუკი მუხტარლის ციხიდან გაუშვებენ, არსებობს მისი ქვეყნიდან გაქცევის საფრთხე.

თბილისიდან 29 მაისს გაუჩინარებული ჟურნალისტი, აფგან მუხტარლი, რომელიც მეორე დღეს ბაქოს ციხეში აღმოჩნდა, ამბობს, რომ ის საქართველოს დედაქალაქიდან კრიმინალური პოლიციის ფორმიანმა პირებმა გაიტაცეს. აზერბაიჯანის ხელისუფლების ინფორმაციით, მუხტარლი საზღვრის უკანონო კვეთის გამო დააკავეს და მას უკვე შეეფარდა სამთვიანი წინასწარი პატიმრობა.